(ඉන්දිකා රාමනායක)

හපුතලේ වතුයායකට ගුවන් යානයක් කඩා වැටීමේ සිද්ධිය සම්බන්ධයෙන් වන පරීක්ෂණ වාර්තාව සති දෙකක් තුළ ලබා දෙන්නැයි ගුවන් හමුදාපති එයාර් මාෂල් සුමංගල ඩයස් මහතා  උපදෙස් දුන්නේය.

එම වාර්තාව  ලැබුණු පසු  ගුවන් අනතුරට හේතුව අනාවරණය කරගත හැකි බවද ගුවන් හමුදාපතිවරයා කියා සිටියේය.

මෙම ගුවන් අනතුර සම්බන්ධයෙන් ලංකාදීපය ගුවන් හමුදාපතියාගෙන්  කළ විමසුමකට පිළිතුරු දෙමින් ඒ මහතා මේ බව සඳහන් කළේය.

මෙම පරීක්ෂණයේ දී ගුවන් අනතුරට හේතුව නිශ්චිත වශයෙන් අනාවරණය නොවුනහොත්  වැඩිදුර විමර්ශන සඳහා අවශ්‍යනම් පමණක් විදේශ රටවල විශේෂඥයන්ගේ සහය  ලබා ගැනීමට  කටයුතු කරන බවද  ඒ මහතා කියා සිටියේය.

පරීක්ෂණ සඳහා විදේශ රටක සහය ලබා ගන්නේ නම්  අවශ්‍ය කොටස්  ඉතා ආරක්ෂිතව  අදාල විදේශ රට වෙත යොමු කරන බවද  ගුවන් හමුදාපතිවරයා පැවසීය.

මීට පෙර  මෙවන් අවස්ථා වලදී  ද පරීක්ෂණ සඳහා විදෙස්  රටවලින් සහය  ලබාගත් බවද ගුවන් හමුදාපතිවරයා  කියා සිටියේය.

ගුවන් හමුදාපතිවරයා පත්කළ එම පරීක්ෂණ කමිටුවට එයාර් වයිස් මාෂල්වරයකු ඇතුලූ  සාමාජිකයන් හය දෙනකු  ඇතුළත් වන බවද ගුවන් හමුදා ආරංචි මාර්ග කියයි.