(විනීතා එම් ගමගේ)

ගම්පොල ඡන්ද කොට්ඨාසයේ, ගලහ, ගුරුකැලේවත්තේ, මිල්ලව වතුයායට පැමිණි පිරිසක් එම වතුයායේ පිහිටි නිවසකට පෙට්‍රල් බෝම්බ ගසා ඡන්දය දීමට නොයන්නැයි තර්ජනය කර ඇති බව මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයට පැමිණිල්ලක් ලැබී ඇත.

අංක තහඩු ආවරණය කළ ජීප් රථයකින් මෙම මැර පිරිස පැමිණ ඇති බවත් ඔවුන් එක් නිවසකට ප්‍රෙටල් බෝම්බ ගසා ඇති අතර තවත් නිවසකට පෙට්‍රල් බෝම්බ ගැසීමට තැත් කර ඇති බව තම සංවිධානයයේ නිරීක්ෂකයන් හරහා තහවුරු කර ගත් බවත් මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා ලංකාදීපයට පැවැසීය.

එම සිද්ධිය පිළිබඳ තහවුරු කර ගැනීමෙන් පසු මහනුවර දිස්ත්‍රික් නියෝජ්‍ය මැතිවරණ කොමසාරිස්වරයා සහ පොලිසිය වෙත දැන් වූ බවත් පූර්ව මැතිවරණ සමයේ යම් ප්‍රචණ්ඩත්වයක් පැවැති අවදානම් පෙදෙසක් ලෙස හඳුනාගෙන සිටි බැවින් එම ප්‍රදේශය පිළිබඳව පොලිසිය දැනුවත් කර තිබූ බවත් හෙතෙම සඳහන් කළේය.

මෙම සිද්ධියෙන් කිසිවෙකුටත් තුවාල සිදුව නැති බවත් ඡන්ද දායකයන් බිය ගැන්වීම සඳහා මෙය සිදුකරන්නට ඇතැයි විශ්වාස කරන බවත් ගජනායක මහතා පැවසීය.