(ඩී.ජී.සුගතපාල)
 
ගාල්ල මහ නගර සභාවේ මාසික රැස්වීම අද (19) පැවති අවස්ථාවේ සභාව එකම ගාලලගෝට්ටියක් බවට පත්විය.
 
නගරාධිපති ප්‍රියන්ත සහබන්දු (පො.පෙ)මහතාගේ ප්‍රධානත්වයෙන් රැස්වීම පැවැත්විණි.
 
මන්ත්‍රීවරුන්ගේ  යෝජනා ඉදිරිපත් කිරීමේ අවස්ථාවේදි ජනතා විමුක්ති පෙරමුණේ සුනිල් ගමගේ මන්ත්‍රීවරයා කියා සිටියේ මෙයට වසරකට පෙර තමා විසින් අසන ලද ප්‍රශ්නයකට තවමත් පිළිතුරු නොදී කල් ඉල්ලීම අසාධාරණ බවය. මන්ත්‍රිවරයා දිගින් දිගටම කරුණු  දක්වා පසුව මේසය මතට ගොඩවිය.
 
ඒ සමගම ජනතා විමුක්ති පෙරමුණේ කුමාර සෙනවිරත්න මන්ත්‍රීවරයාද මේසය මතට ගොඩවී විරෝධය පළ කරන්නට වූ අතර එම පක්ෂයේ නිශාන්ති ප්‍රදිපිකා මන්ත්‍රීවරියද මේසයට ගසමින් ඝෝෂා කරන්නට වූවාය.
 
මෙහිදි කැලුම් සෙනවිරත්න මහතා(පො.පෙ)කියා සිටියේ මන්ත්‍රීවරයාගේ විරෝධය සාධාරණ බවය. ප්‍රශ්නයක් අසා වසරක් යනතුරු පිළිතුරු දිය නොහැකිනම් එය පිළිතුරු සැපයීමට නොහැකි ප්‍රශ්නයක් විය යුතු බවද, පැය දෙකක් තිස්සේ  කරන ලද්දේ මහජන මුදලින් කෑම බීම ගැනීම පමණක් බවද ඒ මහතා කීය.
 
එහිදී සභාව පාලනය කර ගැනීමට අපහසුවීම නිසා නගරාධිපතිවරයා පැය භාගයකට සභාව කල් තබන ලදී. පසුව යලිත් සභාව රැස්වු අවස්ථාවේද සුනිල් ගමගේ මන්ත්‍රීවරයා කියා සිටියේ තම විරෝධය දිගටම පළකරන බවය.
 
මෙහිදි නගරාධිපතිවරයා ඝෝෂාකාරි තත්වය මැද වුවද යෝජනා 49ක් සම්මත කර ගත්තේය.