(ඩයනා උදයංගනී)

කොරෝනා සමයේ මීරිගම මූලික රෝහලේ සායනයකින් තැපැල් මගින් නිවසට එවූ ඖෂධයක් හේතුවෙන් පෙනීම අහිමි වූ මීරිගම, වැවහේනේ පදිංචි ලෙනින් නිරෝෂන් නැමති 16 හැවිරිදි දරුවාගේ ඉදිරි ප්‍රතිකාර කටයුතු වෙනුවෙන් ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය මහාචාර්ය චන්න ජයසුමන මහතාගේ මැදිහත්වීමෙන් රුපියල් ලක්‍ෂයක මුදලක් පරිත්‍යාග කෙරිණි.

රාජ්‍ය අමාත්‍ය මහාචාර්ය චන්න ජයසුමන මහතාගේ මැදිහත් වීමෙන් දිලීප් හේරත් හා වෛද්‍ය ප්‍රසන්න රත්නායක මහත්වරුන්ගේ මූල්‍ය දායකත්වයෙන් මෙම මුදල් පරිත්‍යාගය සිදුකර තිබේ.

ලෙනින් නිරෝෂන් දරුවා වෙත එම මුදල ලබාදීම රාජ්‍ය අමාත්‍යවරයා අතින් එම අමාත්‍ය කාර්යාලයේ දී අද (28) සිදුකෙරිණි.

මෙම දරුවාගේ අනාගතය වෙනුවෙන් දෙනෙත් පාදා දීමට අවශ්‍ය සියලු කටයුතු සඳහා තමන් මැදිගහත් වන බව රාජ්‍ය අමාත්‍ය චන්න ජයසුමන මහතා මෙහිදී පැවසීය.

එමෙන්ම දැඩි ආර්ථික අපහසුතාවයට පත්ව සිටින මෙම දරුවාගේ ඉදිරි අධ්‍යාපන කටයුතු සඳහා අවශ්‍ය සහයෝගය ලබාදෙන බව ද රාජ්‍ය ඇමැතිවරයා පැවසීය.