(සුජිත් හේවාජුලිගේ )

ලංකා විදුලිබල මණ්ඩලය ඇතුළු රාජ්‍ය ආයතන තුනක් ලංකා ඛනිජ තෙල් නීතිගත සංස්ථාවට රුපියල් කෝටි පහළොස් දහසකට වැඩි මුදලක් ණයවී සිටින බව එම සංස්ථාවේ සභාපති සුමිත් විජේසිංහ මහතා පවසයි.

ලංකා ඛනිජ තෙල් නීතිගත සංස්ථාවට වැඩිම මුදලක් ණය වී සිටින්නේ ශ්‍රී ලංකා විදුලිබල මණ්ඩලයයි ණය වී සිටින මුදල රුපියල් කෝටි අට දහස් දෙසීයකි.

මෙයට අමතරව සංස්ථාවට ශ්‍රී ලංකන් එයාර් ආයතනය රුපියල් කෝටි පන් දහස් හත් සියයක මුදලක් ද ස්වාධීන විදුලි නිෂ්පාදකයන් රුපියල් කෝටි එක් දහස් දෙසීයක මුදලක්ද ණය වී සිටින බව සභාපති වරයා සඳහන් කළේය

මේ ආයතන තුනෙන් ඛනිජ තෙල් නීතිගත සංස්ථාවට අය විය යුතු මුළු මුදල රුපියල් කෝටි පහළොස් දහස් එක සියයකි.

මේවා වසර දෙකක් තිස්සේ එකතු වුණු ණය මුදලක් බවත් විදුලිබල මණ්ඩලය 2019 වසරේ මාර්තු මාසයේ ලබාගත් ඉන්ධන වෙනුවෙන් පවා අදාල හිඟ මුදල් ගෙවා නැති බවත් සභාපතිවරයා ප්‍රකාශ කළේය.

මේ හිඟ මුදල් පියවීම සඳහා සහන කාල සීමා ලබා දී ඇතත් නියමිත පරිදි ඒ කටයුතු සිදුනොවීම නිසා හිඟ මුදල් මෙලෙස විශාල වශයෙන් එකතු වන බවත් හිඟ මුදල් කඩිනමින් ගෙවන ලෙස මේ ආයතනවලට සිහි කැඳවීම් ගණනාවක්ම කර ඇති බවත් සුමිත් විජේසිංහ මහතා පැවසුවේය.