(ඉන්දිකා රාමනායක)
 
කොළඹ වරායට පිවිසෙන හා පිටවන මුහුදු මාර්ග අවහිර කරමින් අධි ආරක්ෂිත කලාපයේ නීති විරෝධී ලෙස  ධීවර කටයුතුවල නිරත  ධීවරයින් 13දෙනෙකු යාත‍්‍රා තුනක් සමග  අද(07)  අත්අඩංගුවට ගත් බව නාවික හමුදාව කියයි. 
 
මෙම ප‍්‍රදේශයේ ධීවර කටයුතු තහනම් කර තිබියදී නෞකා සඳහා සංඥා  ලබාදෙන  බෝයාවල  පවා දැල් ගැට ගසමින් ධීවරයින් ධීවර කටයුතුවල නිරත වන බවද නාවික හමුදා මාධ්‍ය ප‍්‍රකාශක ලූතිනන් කමාන්ඩර් ඉසුරු සුරියබණ්ඩාර මහතා පැවසීය.
 
 නාවික හමුදාව  කොතෙක්  එම ප‍්‍රදේශයේ ධීවරයින් දැනුවත් කර ඔවුන් ඉවත් කිරීමට පියවර ගත්ත ද ධීවරයින් නැවත පැමිණ එම ප‍්‍රදේශයේ  ධීවර කටයුතුවල නිරත වන බවද නාවික හමුදා මාධ්‍ය ප‍්‍රකාශකවරයා කීය.
 
මේ සම්බන්ධයෙන් කොළඹ වරාය පොලිසිය දැනුවත් කර පොලිසිය හා නාවික හමුදාව යාත‍්‍රාවකින් නාවික එම ප‍්‍රදේශයේ  සිදුකළ මෙහෙයුමකදී මෙම පිරිස අත්අඩංගුවට ගත් බව ලූතිනන් කමාන්ඩර්  ඉසුරු සුරියබණ්ඩාර මහතා පැවසීය.
 
මෙම මුහුදු  මාර්ග අවහිර කරමින් ධීවර කටයුතුවල නිරත වීම හේතුවෙන් ජාත්‍යන්තර නෞකා  ගමනාගමනයට බාධා වන බවත්    එසේම ධීවරයින්  නෞකාවල ගැටී  අනතුරට පත්වීමේ අවදානම  වැඩි  බවද නාවික හමුදා මාධ්‍ය ප‍්‍රකාශකවරයා  ස`දහන් කළේය.
 
 ජාත්‍යන්තර නෞකාවලට බාධා වන අයුරින්  එම මුහුදු මාර්ග අවහිර කරමින් ධීවර කටයුතු වල නිරත වීම  මෙරටට ජාත්‍යන්තර වශයෙන් බලපාන ගැටලුවක් බවත් එසේ නොකර  ධීවරයින්ට අයත් සීමාවල සිට පමණක්  ධීවර කටයුතුවල නිරත වන ලෙසට නාවික හමුදා මාධ්‍ය ප‍්‍රකාශකවරයා ධීවරයින්ගෙන් ඉල්ලා සිටියි.