ලලිත් නවරත්න

කල්පිටිය මොහොත්තුවරම් නාවික හමුදා අනුකණ්ඩයේ නාවික හමුදා නිලධාරියෙකු මරණයට පත්කරමින් තවත් නිළධාරීන් දෙදෙනෙකුට බරපතල තුවාල සිදුකරමින් වෙඩිතැබීමක් සිදුකර පළාගිය නාවික හමුදා සෙබළා අද (30) ඉච්චන්කාඩු නාවික හමුදා  අනුකණ්ඩයට බාරවී ඇති බව කල්පිටිය පොලීසිය පවසයි.

මෙසේ භාරවී ඇත්තේ කල්පිටිය මොහොත්තුවරම් නාවික හමුදා අනුකණ්ඩයේ සේවය කළ නායක සෙබළ පී. ඒ. ආර්. ආර්. හේරත් නැමැත්තෙකි.

ඉකත් 28දා මධ්‍යම රාත‍්‍රියේ මෙම වෙඩිතැබීම සිදුකර ඇති අතර මෙම වෙඩි තැබීමෙන්  මරණයට පත්ව ඇත්තේ නාවික හමුදා සුලූ නිළධාරී කේ. එස්. විජේවීර නැමැත්තෙකි.

මෙම වෙඩි තැබීමෙන් බරපතල තුවාල ලැබූ නාවික හමුදා බලනැවි  ඩබ්. එම්. ඞී. එස්. කුමරසිංහ සහ නාවික හමුදා ඉංජිනේරු කාර්මික ඒ. ඒ. එස්. එම්. අතුකෝරල මේවන විට පුත්තලම රෝහලේ ප‍්‍රතිකාර ලබයි.

වෙඩි තැබීමෙන් ඝාතනයට පත් නාවික හමුදා නිළධාරියාගේ මෘතශරීරය සම්බන්ධයෙන් මහේස්ත‍්‍රාත් පරීක්ෂණය පවතින තත්වයන් හමුවේ පැවැත්වීමට නොහැකිවී ඇති අතර එය අද පුත්තලම රෝහලේදී පැවැත්වීමට නියමිතය.

ඒ අනුව සැකකරු අද දින පොලිස් භාරයට ගෙන ඉදිරි පරීක්ෂණ පැවත්වීමට නියමිත බව පොලීසිය පවසයි.