(කේ. ඩී . දේවප්‍රිය, එම්. කේ. නන්දසේන සහ දිලීප් ජයසේකර) 

 
කතරගම  දේවාල භූමියේ පිහිටි පුරාණ කිරි විහාරය තුළදී අද (03) පුද්ගලයකු ගිනි තබා ගැනීම හේතුවෙන් විහාරස්ථානයට සුළු හානි වී ඇත.
 
කිරිවිහාරස්ථානය වෙත පැමිණි එම පුද්ගලයා පෙට්‍රල් යොදාගෙන දිවි නසා ගැනීමට උත්සාහ කර ඇති බවත් ගිනි තබා ගත් අවස්ථාවේ එහි සිටි කපු මහතුන් හා බැතිමතුන් ජලය ඉස ඔහුව බේරාගෙන ඇති බවත් පැවසේ. 
 
තුවාල ලැබූ තැනැත්තා කතරගම දිසා රෝහලටත් ඉන් පසු දෙබරවැව මූලික රෝහලටත් මාරු කර යවා ඇත.
 
රෝහල් ගත් කර ඇත්තේ තිස්සමහරාම රන්මිණි තැන්න  පදිංචි අබේසිංහ ලියන ආරචිචගේ සුමණසිරි (59) හැවිරිදි පුද්ගලයෙකි.
 
කතරගම දේවාලයේ ජල බවුසර් යොදා ගින්න මැඩ පැවැත් වූ බව  රුහුණු මහා කතරගම දේවාලයේ බස්නායක නිළමේ දිල්රුවන් රාජපක්‍ෂ මහතා පැවසීය.
 
ගින්නෙන් කිරිවිහාරස්ථානයේ බිත්තිවලට හා වහලේ  සිතුවම්වලට සුළු හානි සිදුවී ඇත.
 
මෙම හේතුව මත කතරගම දේවාලය වැඳ පුදා ගැනීම පැමිණෙන බැතිමතුන්ට කිසිදු බාධාවක් නොවන බවත් රුහුණු මාගම්පත්තුවේ ප්‍රධාන සංඝනායක කතරගම කිරිවෙරෙ රාජමහා විහාරාධිපති පුජ්‍ය කොබවක ධම්මින්දහිමියෝ පැවසූහ. 

(ඡායාරූප -  කේ. ඩී . දේවප්‍රිය)

( ඡායාරූප - දිලීප් ජයසේකර)