(අජිත්ලාල් ශාන්තඋදය සහ අරුණ එස් හේරත්)

පැල්මඩුල්ල නගරයට පානීය ජලය සපයන කිරිඳිගඟ දෙගොඩතලා යද්දී අවට සිටි අයගේ විරෝධය නොතකා කුට්ටපිටිය වටවල ඉමේකැලේ සපත්තු පාලමෙන් එගොඩවීමට ගොස් ජල පහරට හසුව අතුරුදන් වු සිව්දරු පියාගේ සිරුර කිලෝමීටර් පහළොවක් පමණ දුරින් වූ පහළ කුට්ටිපිටිය අමුණුවල ප්‍රදේශයේ තිබී අද (12) දහවල් සොයාගත් බව පැල්මඩුල්ල පොලීසිය පැවසුවේය.

පැල්මඩුල්ල, කුට්ටාපිටිය, වටවල, ඉමේකැලේ පදිංචිකරුවෙකු වූ අයි.කේ.ඒ. රොබෝසිඤ්ඤෝ යන අය මෙසේ ජල පහරට හසුව මියගොස් තිබුණි.

පැල්මඩුල්ල නගරයට පානීය ජලය සපයන ජල මූලාශ්‍රය, කිරිඳිඇල්ල ආදිය ද පසුකර සිරුර පහළට ගසාගෙනවිත් තිබුණි. මියගිය අය 11දා සවස 05.00ට පමණ සැඩපහරට හසුව අතුරුදන්ව තිබු අතර අද (12) දහවල් සිරුර හමුව තිබුණි.

ගොඩ ගනු ලැබූ සිරුර මේ වනවිට කහවත්ත මූලික රෝහලේ මෘත ශරීරාගාරයේ තැන්පත් කර ඇත. මරණ පරීක්‍ෂණය හෙට (13) සිදු කිරීමට නියමිතය.