2022 ජනවාරි මස 24 වන සඳුදා
(උපාලි ආනන්ද )
ශ්‍රී ලංකා යුද හමුදාවේ ගජබා රෙජිමේන්තුවේ සේනා විධායකවරයාව සිටි කර්නල් ජයන්ත සුරවීර මහතා ඇතුළු අට දෙනෙකු විල්පත්තුව ජාතික වනෝද්‍යානය තුළදී කොටි ත්‍රස්තවාදීන් විසින් වෙඩි තබා ඝාතනය කිරීමේ සිද්ධියට අදාළ නඩුව ලබන නොවැම්බර් 13 වැනි දා විභාගයට ගැනීමට අනුරාධපුර අංක දෙක මහාධිකරණයේ විනිසුරු ගියාන් චන්ද්‍ර රණවක මහතා නියෝග කළේය.
මෙම නඩුවේ විත්තිකාර කොටි සංවිධානයේ හිටපු සාමාජිකයින් දෙදෙනා එදින දක්වා තවදුරටත් රිමාන්ඩ් බාරයේ තබන ලෙස ද මහාධිකරණ විනිසුරුවරයා නියෝග කළේය.
මෙම සිද්ධියට අදාළ නඩුව අනුරාධපුර අංක දෙක මහාධිකරණය හමුවේ යළි කැඳවූ අවස්ථාවේ මෙසේ නියෝග කෙරිණි.
මහාධිකරණය හමුවේ අධිචෝදනා ලබා දැනට වසර හතකට අධික කාලයක් මෙසේ රිමාන්ඩ් බාරයට පත්ව සිටිනුයේ සූරියකාන්තන් ජෙයචන්ද්‍රන් හෙවත් උදයන් හෙවත් අයියන් සහ ශිව ප්‍රකාශන් ශිවශීලන් හෙවත් ඉලෙයියන් යන කොටි සංවිධානයේ හිටපු ප්‍රබල සාමාජිකයින් දෙදෙනෙකි.
අනුරාධපුර විශේෂ මහාධිකරණයේ භාෂා පරිවර්තක සාවිල් හමිදු මොහොමඩ් නිලාම් මහතා මෙම නඩුවේ භාෂා පරිවර්තක ලෙස කටයුතු කරයි.
රජයේ ජ්‍යෙෂ්ඨ අධිනීතිඥ රියාස් බාරි මහතා සමඟ ත්‍රස්ත විමර්ශන කොට්ඨාසයේ නිලධාරීන් කණ්ඩායමක් පැමිණිල්ල වෙනුවෙන් පෙනී සිටි අතර විත්තිකරුවන් වෙනුවෙන් නීතිඥ කාලිංග රවින්ද්‍ර මහතා පෙනී සිටියේය.
