( පුෂ්පකුමාර ජයරත්න )

කුරුණෑගල තෝරයාය නාරම්පනාව ප්‍රදේශයේ වැසිකිළි වලක් කැනීමේදී හමුවූ ඉපැරැණි පොසිලය අද ( 10 ) පෙරවරුවේ පුරා විද්‍යා දෙපාර්තමේන්තුවේ නිලධාරීන් පිරිසකගේ පරීක්ෂාවට ලක් වූහ .

පුරා විද්‍යා දෙපාර්තමේන්තුවේ අධ්‍යක්ෂ ජනරාල් මහාචාර්ය සෙනරත් දිසානායක මහතාගේ උපදෙස් අනුව කැණීම් අංශයේ නිලධාරිනි සුදේනී රණසිංහ සහ ගවේෂණ නිලධාරිනි උදේනී වික්‍රමසිංහ මහත්මීහු එම පොසිලය පරීක්ෂාවට ලක් කළහ . 

පොළොව මට්ටමේ සිට අඩි 8 ක් පමණ ගැඹුරකදී හමුවුනු මෙම පොසිලය දැඩි ලෙස ඝනීභවනය වී ඇති බවද දැකගන්නට ලැබුණු පොසිල කොටස් අනුව මෙය උරගයෙකුගේ විය හැකි යැයි සැක කරන බවද පැවසූ පුරා විද්‍යා නිලධාරීහු  ඉදිරියේදී මෙම ස්ථානය කැණීමට ලක් කරන බවද පැවසූහ .

එහිදී ස්ථිර වශයෙන්ම මෙම පොසිලය සම්බන්ධයෙන් තොරතුරු අනාවරණය කරගත හැකි බවද එතෙක් හානියක් නොවන ආකාරයට වැලි ස්ථරයක් යොදා එම පොසිලය ආරක්ෂිතව තැබීමට ⁣පියවර ගත් බවද කැණීම් නිලධාරිනි සුදේනී රණසිංහ මහත්මිය පැවසුවාය  .

තෝරයාය නාරම්පනාව පදිංචි මිල්ටන් සෝමරත්න මහතාගේ නිවසේ වැසිකිළි වලක් කැපීමේදී මෙම පොසිලය හමුවී තිබේ.