(තිළිණි ද සිල්වා සහ රංජන් කටුගම්පොළ )
 
 
ක්‍රිකට් ආයතනයේ නිලවරණය සඳහා එහි හිටපු සභාපති තිලංග සුමතිපාල මහතා විසින් බාර දී ඇති නාම යෝජනා පත්‍රය ප්‍රතික්ෂේප කිරීමේ නියෝගයක් නිකුත් කරන මෙන් ඉල්ලා  ශ්‍රී ලංකා ක්‍රිකට් ආයතනයේ හිටපු ලේකම් නිශාන්ත රණතුංග මහතා  ගොනු  කර ඇති පෙත්සම සලකා බැලීම ලබන ජනවාරි මස 22 වැනි දා  දක්වා කල් තැබීමට අභියාචනාධිකරණය නියම කරන ලදී.
 
එම පෙත්සම අභියාචනාධිකරණය සභාපති විනිසුරු ප්‍රීති පද්මන් සූරසේන සහ අර්ජුන ඔබේසේකර යන විනිසුරු මඩුල්ල හමුවේ අද (03) කැඳවනු ලැබූවත් වෙනත් නඩු රාශියක් විභාගයට ගැනීමට නියමිතව ඇති බැවින් මෙම පෙත්සම සළකා බැලීම මෙදිනට කල් තැබිණි.
 
නිශාන්ත රණතුංග මහතා සිය පෙත්සමින් පෙන්වා දෙන්නේ  ශ්‍රී ලංකා ක්‍රිකට් ආයතනයේ හිටපු සභාපතිවරයා ලෙස කටයුතු කළ තිලංග සුමතිපාල මහතාට එම ධුරය සඳහා නාමයෝජනා බාරදීම සඳහා සුදුසුකම් නොමැති බවයි.

එසේ තිබියදී ඔහුගේ නාමයෝජනා පත්‍රය ක්‍රිකට් නිලවරණ කමිටු විසින් බාරගෙන ඇති බවත් එය නීතිවිරෝධී යැයි පෙන්වා දෙන පෙත්සම්කරු එබැවින් එය බල රහිත කිරීමේ ආඥාවක් නිකුත් කරන මෙන් ද අභියාචනාධිකරණයෙන් ඉල්ලා තිබේ.