(ගාමිණී බණ්ඩාර ඉලංගන්තිලක)


නාවලපිටිය, කුරුඳුවත්ත පොලිස් බල ප්‍රදේශයට අයත් මල්ගොල්ල ගම්මානයේ පුද්ගලයෙකු තියුණු ආයුධයකින් කපා කොටා ඝාතනය කර  ඇතැයි කුරුඳුවත්ත පොලීසිය පවසයි.


මෙසේ ඝාතනය වී ඇත්තේ කුරුඳුවත්ත, මල්ගොල්ල ගම්මානයේ පදිංචිව සිටි වයස අවුරුදු 62 ක පමණ වු පුද්ගලයෙකි. ඊයේ රාත්‍රී මෙය සිදු වී තිබේ.
පෞද්ගලික  ආරාවුලක් මත මෙම ඝාතනය සිදු කර  ඇති බවට  මුලික පරීක්ෂණ මත හෙළිවී ඇතැයි පොලීසිය සඳහන් කරයි. 


සිද්ධියට සම්බන්ධ සැකකරු මිය ගිය පුද්ගලයාගේ නිවසට පැමිණ පළමුව තියුණු ආයුධයකින් කපා කොටා ඇති අතර එම ආරාවුල බේරීමට පැමිණි මිය ගිය පුද්ගලයාගේ බිරිඳද මෙම පුද්ගලයා විසින් කපා කොටා තුවාල සිදු කර තිබේ.


තුවාල ලැබු පුද්ගලයා ත්‍රී රෝද රථයකින් රෝහල වෙත රැගෙන යද්දී සැකකරු යතුරු පැදියකින් පැමිණ ත්‍රී රෝද රථය හරස් කොට නවතා තුවාල ලබා රෝහල් රැගෙන යමින් සිටි පුද්ගලයා නැවැත ත්‍රී රෝද රථය තුලදීම පිහි පහර කිහිපයක් එල්ල කර  අනතුරුව ඔවුන් පැමිණි ත්‍රිරෝද රථය  මාර්ගයෙන් ඉවතට තල්ලු කර දමා තිබේ.


සිද්ධියෙන් තුවාල ලැබු මිය ගිය පුද්ගලයාගේ බිරිඳ දැනට ප්‍රතිකාර සඳහා දොලොස්බාගේ ප්‍රාදේශීය රෝහලට ඇතුළත් කර ඇති අතර සැකකරු  මේවනවිට ප්‍රදේශයෙන් පළා ගොස් ඇතැයි පොලීසිය පවසයි.


සිද්ධියට සම්බන්ධ සැකකරු අත්අඩංගුවට ගැනීමට විශේෂ පරික්ෂණයක් ආරම්භ කොට ඇතැයි කුරුඳුවත්ත පොලීසිය පවසයි.