( තිළිණි ද සිල්වා )
 
කටාර් හි දෝහා නුවර පිහිටි ශ්‍රී ලංකා තානාපති කාර්යාලය සති දෙකකට තාවකාලිකව වසා දැමූ බව  එම තානාපති කාර්යාලය කියා සිටී.
 
එම ශ්‍රී ලංකා තානාපති කාර්යාලයේ සේවය කරන නිලධාරියෙකුට කොරෝනා වෛරසය ආසාදනය වීම හේතුවෙන් මෙම තීරණය ගත් බවද එම තානාපති කාර්යාලය අද (23)  නිවේදනයක් නිකුත් කරමින් කියා සිටී.
 
ඒ අනුව  ඊයේ(22)   සිට ලබන ඔක්තෝබර් මස 5 වන දින තෙක් තානාපති කාර්යාලය තාවකාලිකව වසා තැබෙන බවද ශ්‍රී ලංකා තානාපති කාර්යාලය  වැඩිදුරටත් සිය නිවේදනයේ සදහන් කර ඇත.
 
කටාර් හි ශ්‍රී ලංකා තානාපති කාර්යාලයේ සේවකයෙකු කොරෝනා ආසාදනය වී ඇති බවට වෛද්‍ය පරීක්ෂණ වලින් තහවුරු වීමත් සමග ආරක්ෂිත පියවරක් ලෙස තාවකාලිකව එම කාර්යාලය වසා දැමීමට තීරණය කළ බව එම තානාපති කාර්යාලය කියා සිටී.
 
එම සේවකයා ඔහු එරට වෛද්‍ය බලධාරීන් ගේ උපදෙස් මත ස්වයං  නිරෝධායනයට යොමු කර ඇති අතර අනෙකුත් කාර්ය මණ්ඩල සාමාජිකයින්ට එම වයිරසය වැළදී ඇත්දැයි යන්න තහවුරු කර ගැනීමට පී.සී.ආර් පරීක්ෂණ සදහා යොමු කළ කර ඇත.
 
දෝහා නුවර පිහිටි ශ්‍රී ලංකා කාර්යාලයට නිරතුරුවම ලාංකිකයින් විශාල පිරිසක් කොන්සියුලර් සේවා සදහා පැමිණෙන හෙයින් ඔවුන්ගේ ආරක්ෂාව සදහා සති දෙකකට එම කාර්යාලය වසා දමා තීරණය කළ අතර මෙම කාලය තුළ හදිසි සේවාවන් සඳහා consular.doha@mfa.gov.lk විද්‍යුත් ලිපිනය හෝ 00974703413 සහ  00970088771දුරකථන අංක භාවිතා කරන්නැයි ද තානාපති කාර්යාලය දැනුම් දී සිටී.

සෞදි අරාබියේ ජෙඩා නුවර පිහිටි ශ්‍රී ලංකා කොන්සියුලර් කාර්යාලයේ සේවය කළ අයෙකුට කොරෝනා වයිරසය ආසාදනය වීමත් සමග එම කාර්යාලය ද සති දෙකක කාලයකට තාවකාලිකව වසා දැමිණි.