( තිළිණි ද සිල්වා )

කටුනායක ගුවන්තොටුපළේ ගුවන් මගී තදබදය අවම කිරීම සදහා ආගමන හා විගමන පහසුකම් පුළුල් කරන බව සංචාරක ඇමති ප්‍රසන්න රණතුංග මහතා පවසයි.

මේ යටතේ ගුවන්තොටුපලේ විගමන කවුළු සංඛ්‍යාව 18 සිට 23 දක්වා වැඩි කිරීමටත්, ආගමන කවුළු සංඛ්‍යාව 25 සිට 31 දක්වා ද වැඩි කිරීමට කටයුතු කරමින් සිටින බව ද ඇමතිවරයා පැවසීය .

මෙම ආගමන හා විගමන කවුළු නවීන තාක්ෂණයෙන් ද සමන්විත බව හෙතෙම කීය.

කටුනායක ගුවන් තොටුපළේ විගමන කටයුතු සදහා වෙන් වු ප්‍ර දේශය පහසුකම් සහිතව වැඩි දියුණු කිරීම, ආගමන කටයුතු සදහා පහසුකම් සහිත නව ප්‍රදේශයක් වෙන්කිරීම හා තිරුබදු රහිත සාප්පු සංකීර්ණයක් ඉදිකිරිමට ද කටයුතු කෙරෙමින් පවතින බව ඇමතිවරයා පැවදීය.

නව ආගමන ගුවන් බඩු පර්යන්තයක් ද අදියර කීපයක් යටතේ ඉදි කිරීමට සැලසුම් කර තිබේ.

කටුනායක ගුවන් තොටුපළේ වාර්ෂික මගී ධාරිතාව ගුවන් මගීන් මිලියන 06 ක් වන අතර මේවන විට කටුනායක ගුවන් තොටුපළ වාර්ෂිකව මිලියන 10 ක  මගී මෙහෙයුම් සිදු කෙරේ.

දැනට ක්‍රියාත්මක කටුනායක ගුවන් තොටුපළ පුළුල් කිරීමේ ව්‍යාපෘති යටතේ වාර්ෂික ගුවන් මගීන් ධාරිතාව මිලියන 15 ක් දක්වා වැඩි කිරීමට හැකියාව ලැබෙන බව ද අමාත්‍යවරයා වැඩිදුරටත් කියා සිටියේය.

පවතින මගී පර්යන්තයන්හි මගී ධාරිතාව වැඩි කිරීම සදහා ප්‍රතිව්‍යුහගත කිරීම් හා ප්‍රතිසංස්කරණ කටයුතු ද මේ වන විට ආරම්භ කර ඇති අතර ගුවන් තොටුපළේ රැදී සිටින කාලය තුළ විවේකාගාර පහසුකම් ඉල්ලා සිටින මගීන්ට එම සේවාව ලබා දීම සදහා දැනට ඇතිවිවේකාගාර අදියර කිපයක් යටතේ නවීකරණයට සැලසුම් කර ඇතැයි ද හෙතෙම වැඩිදුරටත් කීය.

කටුනායක ගුවන්තොටුපලේ මෙම ප්‍රතිසංස්කරණ කිරීම් අමාත්‍ය ප්‍රසන්න රණතුංග මහතා විසින් පසුගියදා නිරීක්ෂණය කළේය.