ඕස්ට්‍රේලියාවේ හටගෙන ඇති ලැව්ගිනි සිඩ්නි නගරය අවට ප්‍රදේශ වලට ද පැතිරීමේ අවදානමක් ඇති බවට අනතුරු අඟවා ඇතැයි වාර්තා වේ.

අවදානමට ලක්වියහැකි ප්‍රදේශ වල පදිංචිකරුවන්ට ආරක්ෂිත ස්ථාන කරා ඉවත්වීමට බලධාරීන් නියෝග කර ඇත.

පසුගිය දින කිහිපයේ ලැව්ගිනි හේතුවෙන් අවම වශයෙන් තිදෙනකු මියගොස් දහස්ගණන් අවතැන් වී ඇති බව බලධාරීහු කියති.

නිව් සවුත් වේල්ස් හා ක්වින්ස්ලන්ඩ් ප්‍රාන්තවල ස්ථාන 100ක පමණ ලැව්ගිනි හටගෙන ඇතැයි ගිනි නිවන අංශ පවසයි.

සිඩ්නි නගරය මෙවන් අනතුරුදායක තත්ත්වයකට මුහුණදී ඇත්තේ වසර දහයකට පමණ පසුව බවත් උතුරු දිග හන්ටර් කළාපය ද අවදානමට ලක්ව ඇති බවත් සඳහන් වේ.

අඟහරුවාදා වනවිට නගරයේ උෂ්ණත්වය සෙල්සියස් අංශක 37 ක් දක්වා ඉහළ යනු ඇති බවත් එවිට තත්ත්වය වඩාත් නරක අතට හැරෙනු ඇති බවත් කාළගුණ අංශ අවධාරනය කර ඇත.

අවදානමට ලක්වියහැකි ප්‍රදේශ වල පාසැල් වසා දමා ඇති අතර නවසීලන්තයෙන් ද ගිනි නිවන භටයන් කැඳවා ඇතැයි වාර්තා වේ.

(බීබීසී ඇසුරිණි - 085)