(නිමන්ති රණසිංහ)
 
ශ්‍රී ලංකා ගුවන් හමුදාවට මිග් යානා මිලදී ගැනීමේදී මූල්‍ය අක‍්‍රමිකතාවක් සිදුවූ බව කියන සිද්ධියට සම්බන්ධයෙන් රක්ෂිත බන්ධනාගාර ගත කර සිටින රුසියාවේ හිටපු තානාපති උදයංග වීරතුංග මහතා හදීසි රෝගී තත්ත්වයක් හේතුවෙන් කොළඹ ජාතික රෝහලේ ගෙවන වාට්ටුවට ඇතුළත් කර ඇතැයි බන්ධනාගාර ආරංචි මාර්ග සදහන් කරයි.
 
කොළඹ රිමාන්ඞ් බන්ධනාගාර රෝහලේ රදවා සිටි උදයංග වීරතුංග මහතා මෙලෙස කොළඹ ජාතික රෝහල වෙත ඇතුළත් කර ඇත්තේ පසුගිය 25 වැනිදා බවත්, මේ වන විට බන්ධනාගාර ආරක්ෂාව මධ්‍යයේ ප‍්‍රතිකාර ලබමින් සිටින බවත් එම ආරංචි මාර්ග වැඩිදුරටත් පවසයි.
 
මෙම මිග් යානා ගනුදෙනුවට අදාළව අපරාධ පරික්ෂණ දෙපාර්තමේන්තුව විසින් උදයංග වීරතුංග මහතා අත්අඩංගු-වට ගනු ලැබුවේ ඉකුත් පෙබරවාරි මස 14 වැනිදාය.