( තිළිණි ද සිල්වා සහ රංජන් කටුගම්පොළ )
 
ඊ.ටී.අයි මූල්‍ය සමාගමේ සියලු වත්කම් පවරා ගෙන එහි තැන්පතුකරුවන්ට සිය මුදල් යළි ගෙවන ලෙසට නියෝග කරමින් ශ්‍රී ලංකා මහ බැංකුවට නියෝග කරන ලෙස ඉල්ලා එම ආයතනයේ තැන්පතුකරුවන්ගේ සංගමය විසින් අද (4) ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කරන ලදී.

එදිරිසිංහ ට්‍රස්ට් ඇන්ඩ් ඉන්වෙස්මන්ට් ආයතනයේ තැන්පතුකරුවන් ආරක්ෂා කිරීමේ සංවිධානය විසින් ගොනු කර ඇති මෙම පෙත්සමෙහි වගඋත්තරකරුවන් හැටියට  ශ්‍රී ලංකා මහ බැංකුවේ මූල්‍ය මණ්ඩලය , ම බැංකු අධිපති , ඊ.ටි.අයි මූල්‍ය සමාගම , එහි අධ්‍යක්ෂවරුන් ඇතුළු 18 දෙනෙකු නම් කරනු ලැබ ඇත.
 
නීතීඥ මංජුල බාලසූරිය මහතා මඟින් ගොනු කර ඇති පෙත්සමේ මෙසේද සඳහන් වේ.
 
පෙත්සම්කරුවන්ගේ සංවිධානය ඊ.ටී.අයි ෆිනෑන්ස් සමාගමෙහි තැන්පතුකරුවන්ගෙන් සමන්විත සංවිධානයකි. ශ්‍රී ලංකා මහ බැංකුව විසින් තම ආයතනය තැන්පතු බාර ගැනීමේ ආයතනයක් හැටියට පිළිගෙන ඇති බැවින් තම ආයතනයේ මුදල් තැන්පතු කරන ලෙසද ඊ.ටී.අයි ආයතනය මාධ්‍ය මඟින් ප්‍රචාරය කරනු ලැබිණි.
 
ඒ අනුව පෙත්සම්කාර සංවිධානයේ සාමාජිකයින් සිය මුදල් එම ආයතනවල තැන්පතු කළහ. තත්ත්වය මෙසේ තිබියදී 2018 ජනවාරි 2 වැනිදා ශ්‍රී ලංකා මහ බැංකුව විසින් නිවේදනයක් නිකුත් කරමින් තාවකාලික පියවරක් හැටියට අදාළ වගඋත්තරකාර මූල්‍ය ආයතනය පාලනය කිරීමට කමිටුවක් පත් කර ඇති බවත්, තැන්පතු ආපසු ගැනීම තාවකාලිකව නවතා ඇති බවත් මාස හයක කාලයකට පමණක් වලංගු වන බවත් එම නිවේදනයේ වැඩිදුරටත් සඳහන් විනි යැයි පෙත්සම්කරුවෝ කියා සිටිති.
 
එහෙත් මෙම තත්ත්වය මෙතෙක් කිසිදු වෙනසකට භාජනය වී නොමැත.කෙසේ නමුත් මෙතෙක් ශ්‍රී ලංකා මහ බැංකුවේ පාලක මණ්ඩලය විසින් මෙම තත්ත්වයට එරෙහිව කිසිදු පියවරක් ගෙන නොමැත.