මාලදිවයිනේ පැවැත්වෙන දකුණු ආසියානු කතානායකවරුන්ගේ සමුළුව අතරවාරයේදී ඉන්දීය රාජ්‍ය සභාවේ නියෝජ්‍ය සභාපතිවරයා සහ පාකිස්තාන ජාතික මන්ත්‍රණ සභාවේ නියෝජ්‍ය කතානායකවරයා අතර උණුසුම් වචන හුවමාරුවක් සිදුව තිබේ.

කාශ්මීරය මුල් කරගනිමින් ඔවුන් දෙදෙනා අතර එලෙස උණුසුම් අයුරින් වචන හුවමාරු වී තිබේ. පාකිස්තාන පාර්ලිමේන්තුවේ පහළ මන්ත්‍රී මණ්ඩලයේ නියෝජ්‍ය කතානාය කසීම් සූරි කරන ලද ප්‍රකාශයක් මුල් කරගනිමින් දෙදෙනා අතර එලෙස වචන හුවමාරු විය. කාශ්මීර ජනතාව “පීඩාවට” පත් කිරීම කිසිසේත් නොසලකා හැරිය නොහැකි යැයි කසීම් සූරී අවස්ථා කිහිපයකදීම සඳහන් කළේය

ලෝක ප්‍රජාවට මේ සම්බන්ධයෙන් දෑස් වසාගෙන සිටිය නොහැකි බවත් පාකිස්තාන පාර්ලිමේන්තුව “පීඩාවට පත්වූ සියලුදෙනා” සමඟ එකට නැගී සිටින බවත් හෙතෙම කීවේය. කාශ්මීර අර්බුදය විසඳාගත යුත්තේ කාශ්මීර ජනතාවගේ කැමැත්තට සහ එක්සත් ජාතීන්ගේ ආරක්ෂක කවුන්සිලයේ නිර්දේශවලට අනුව යැයි ද ඔහු පැවැසීය.

කසීම් සූරීගේ එම ප්‍රකාශවලින් දැඩි කෝපයට පත් ඉන්දීය පාර්ලිමේන්තුවේ ඉහළ මන්ත්‍රී මණ්ඩලයේ නියෝජ්‍ය කතානායක හරිවන්ශ් නාරායන් සිංග් ස්ථාවර නියෝග යටතේ විමසීමක් කළේය. මාලදිවයින් පාර්ලිමේන්තුවේ කතානායක මොහොමඞ් නෂීඞ් ඊට අවසර දුන්නේය.

“ඉන්දියාවට සම්බන්ධ අභ්‍යන්තර කරුණක් මෙම සමුළුවේදී මතු කිරීමට අපි දැඩි විරෝධය පළ කරනවා. මෙම සමුළුවේ තේමාවට අදාළ නොවන කරුණු මතුකරමින් මෙම සමුළුව දේශපාලනීයකරණය කිරීමට ගන්නා උත්සහායට ද අපි අපේ විරුද්ධත්වය පළ කරනවා” යැයි සිංග් කීවේය.

“පාකිස්තානය දේශසීමාවේ කරන ත්‍රස්තවාදය නවත්වන්න ඕනේ. ඒ සඳහා දැඩි අවශ්‍යතාවක් තියෙනවා. ඒ වගේම කලාපයේ සාමය සහ ස්ථාවරත්වය වෙනුවෙන් පාකිස්තානය ත්‍රස්තවාදයට රාජ්‍ය සහාය දීමද නවත්වන්න ඕනේ” යැයි ඔහු කීය.

මනුෂ්‍යත්වයට සහ ලෝකයට තිබෙන විශාලතම තර්ජනය ත්‍රස්තවාදය බවත් සූරීගේ ප්‍රකාශ සමුළුවේ කොටසක් නොවීමට මෙහි සිටින සියලු දෙනා පියවර ගත යුතු බවත් හෙතෙම පැවැසීය.

මෙම සමුළුවේදී තිරසර සංවර්ධන අරමුණු ගැන පමණක් සාකච්ඡා කළ යුතු බව මාලදිවයින් පාර්ලිමේන්තුවේ කතානායක මොහොමඞ් නෂීඞ් මේනම අන්තර් පාර්ලිමේන්තු සංගමයේ මහලේකම් මාර්ටින් චන්ගොන්ග් යන දෙදෙනා පැවැසූ බව ද සිංග් පෙන්වා දුන්නේය.

හින්දුස්තාන් ටයිම්ස් ඇසුරිනි 

055