(පුෂ්පකුමාර මල්ලවආරච්චි)

ශ්‍රී ලංකන් ගුවන් සේවය ලාභ ලබන ආයතනයක් බවට පත් කිරිම සඳහා මේ වනවිට ආයතනය තුළ පවතින තත්ත්වය, මුහුණ දී තිබෙන ගැටලු හා ඊට අදාළ දිගුකාලින හා කෙටිකාලින විසදුම් යෝජනා ඇතුළත් කඩිනම් යෝජනාවලියක් සකසන ලෙස කාර්මික අපනයන, ආයෝජන ප්‍රවර්ධන, සංචාරක හා  සිවිල් ගුවන් සේවා අමාත්‍ය ප්‍රසන්න රණතුංග මහතා බලධාරින්ට උපදෙස් ලබාදී තිබේ.

සංචාරක හා සිවිල් ගුවන් සේවා අමාත්‍යාංශයේ ලේකම්වරයා ඇතුළු බලධාරින් සමඟ  පැවති සාකච්ඡාවක දි ඇමැතිවරයා මෙලෙස උපදෙස් දී ඇත.

 ශ්‍රී ලංකන් ගුවන් සමාගමේ කටයුතු කිරීමේදී දේශීයත්වයට ප්‍රමුඛතාවය ලබා දෙන ආකාරයෙන් කටයුතු කරන ලෙසද  මගීන්ට සංග්‍රහ කිරීම සඳහා දේශීය නිෂ්පාදන ලබා ගන්නා ලෙස ද ඇමැතිවරයා ප්‍රකාශ කළේය.

සමාගම්වල  ටෙන්ඩර් වලට සාමාන්‍ය පුද්ගලයකු අයදුම් කරන්න බැරි තරම් නීති රීති වලින් වැහිලා. ඒ තත්ත්වය නැති කර දේශීය ව්‍යාපාරිකයන්ට ටෙන්ඩර් ලබා ගැනීමේ පහසුකම් ඇති කරන ලෙසද ඇමැතිවරයා දැනුම් දුන්නේය.    

මෙහි දි අදහස් දැක්වු ශ්‍රී ලංකන් ගුවන් සමාගමේ සභාපති අශෝක් පතිරගේ මහතා සඳහන් කළේ ශ්‍රී ලංකන් ගුවන් සමාගම ලාභ ලබන තත්ත්වයට පත් කිරීමට කටයුතු කරන බවයි. කලාපයේ දියුණුම ගුවන් සේවාව බවට ශ්‍රී ලංකන් ගුවන් සේවය පත් කිරීම සිය අපේක්ෂාව බව ද සභාපතිවරයා කීවේය. අමාත්‍යාංශ ලේකම් එස්.එම්. මොහොමඩ් මහත්මිය ආචාර්ය ජගත් වැල්ලවත්ත මහතා ඇතුළු නිලධාරීන් මෙම අවස්ථාවට එක්ව සිටියහ.