(හර්ෂණ තුෂාර සිල්වා)

අග්නිදිග ආසියානු ජාතීන්ගේ සංවිධානය(ආසියාන්) ආරම්භ කර වසර 52ක් සැපිරීම නිමිත්තෙන් විශේෂ උත්සවයක් කොළඹ ඉන්දුනීසියානු තානාපති කාර්යාල පරිශ්‍රයේදී අද (8) පෙරවරුවේ පැවැත්විණි. 

මෙහිදී ආසියාන් සංවිධානයේ ධජය ඔසවන ලද අතර ශ්‍රී ලංකාවේ ඉන්දුනීසියානු තානාපති ගුස්ති  න්ගුරා ආර්ඩියාසා මහතා පිළිගැනීමේ කතාව කළේය.

ඉන් අනතුරුව ශ්‍රී ලංකාවේ තායිලන්ත තානාපතිනි චුලමනී චාර්ට්සුවාන් මහත්මිය අදහස් දැක්වූවාය. ශ්‍රී ලංකාවේ විදේශ කටයුතු අමාත්‍යාංශයේ ලේකම් රවිනාථ ආර්යසිංහ මහතා ඉන් අනතුරුව අදහස් දැක්වීය.

තායිලන්තය ආසියාන් සංවිධානයේ වත්මන් සභාපතීත්වය හොබවයි.

1967 වසරේ අගෝස්තු 8 වැනිදා තායිලන්තයේ බැංකොක් අගනුවරදී අග්නිදිග ආසියානු ජාතීන්ගේ සංවිධානය (ආසියාන්) සංවිධානය ආරම්භ කරන ලදි. අග්නිදිග ආසියානු රටවල විදේශ අමාත්‍යවරුන් පස් දෙනකුගේ සහභාගීත්වයෙන් ආසියාන් සංවිධානයේ පළමු හමුව පැවැති අතර එහිදි බැංකොක් ප්‍රකාශනයට ද අත්සන් තබන ලදි. කලාපයේ සාමය, ආරක්ෂාව සහ සෞභාග්‍යය සඳහා කැපවීම කෙරෙහි එහිදි අවධානය යොමු කරන ලදි.

ආසියාන් සංවිධානය අද වනවිට කලාපයේ රටවල් අතර ආර්ථික, දේශපාලන, හමුදා සහ ආරක්ෂක, අධ්‍යාපන සහ සමාජ හා සංස්කෘතික අංශ අතර සහයෝගීතාව වැඩි කිරීම සම්බන්ධයෙන් ද අවධානය යොමු කර ඇත.

ශ්‍රී ලංකාවේ ඉන්දීය මහ කොමසාරිස් තරංජිත් සිං සන්ධු, ශ්‍රී ලංකාවේ මැලේසියානු මහ කොමසාරිස් ටැන් යැන්ග් තායි,  මියන්මාර තානාපති හන් තු යන මහත්වරුන් වියට්නාම තානාපතිනි පන් කියු තු හා ශ්‍රී ලංකාවේ එක්සත් ජාතීන්ගේ නේවාසික සම්බන්ධීකාරක හනා සිංගර් යන මහත්මීහු, රාජ්‍ය තාන්ත්‍රික නියෝජිතවරු ඇතුළු පිරිසක් මෙම අවස්ථාවට එක්වූහ.

(ඡායාරූප - රොමේෂ් ධනුෂ්ක සිල්වා)