(නිමල කොඩිතුවක්කු)
 

මහදැන මුත්තාගේ කතාවේදී මෙන්  ආණ්ඩුව එළුවත්, මුට්ටියත් දෙකම අහිමි කරගෙන ඇතැයි එක්සත් ජාතික පක්ෂයේ මහලේකම්  පාලිත රංගේ බණ්ඩාර මහතා කොළඹ දී අද (3) පැවසීය.

ආණ්ඩුවට අද වන විට ජනවරමත්, ජාත්‍යන්තරයත්, ජාතික සම්පත් යන සියල්ල අහිමි වී ඇතැයි ද මහ ලේකම්වරයා සඳහන් කළේය.

ජාතික සම්පත් සුරකින බවට පොරොන්දු දී බලයට පැමිණි ආණ්ඩුවට අද සිදුව ඇති දෙය පිළිබඳ ජනතාව බලා සිටින බව ද පිටකෝට්ටේ සිරිකොත එක්සත් ජාතික පක්ෂ මූලස්ථානයේ පැවැති මාධ්‍ය හමුවකට එක්වෙමින් ඔහු පැවසීය.

එහිදී වැඩිදුරටත් අදහස් දැක්වූ එක්සත් ජාතික පක්ෂ මහලේකම් පාලිත රංගේ බණ්ඩාර මහතා මෙසේද කීය.

"මේ ආණ්ඩුව එක බොරුවක් වහගන්න තවත් බොරු රාශියක් ගොතමින් බොරුවෙන් ජීවත් වෙනවා. බොරුවෙන් ජීවත් වෙන ආණ්ඩුව කොළඹ වරායේ නැගෙනහිර පර්යන්තය සම්බන්ධ සිද්ධියේදී තමන්ගේ හෙලුව රටට පෙන්නුවා.

මහදැනමුත්තගෙ තීන්දුවේ අනිත් එක තමයි මෙතන දී රජයට සිද්ධ වුණේ. මහදැන මුත්තාට එලුවා බේර ගන්නත් බැරිවුණා මුට්ටිය බේර ගන්නත් බැරි වුණා. 
 
ආණ්ඩුවටත් අද එකක්වත් බේරගන්න බැරි වෙලා තියනවා. අද ආණ්ඩුවට වරාය බේරගන්න බැරි වෙලා තියෙනවා, අනිත් පැත්තෙන් ජාත්‍යන්තරය අහිමි වෙමින් යනවා, තව පැත්තකින් තමන්ගේ  ජන වරම අහිමි වෙලා තියනවා. මේ ආණ්ඩුවට නිසි දැනුමක් නිසි කළමනාකරණයක් නොමැති වීම මෙයට හේතුවයි.’’