(විනීතා එම් ගමගේ)

අවිස්සාවේල්ල සිට පෑලියගොඩ දක්වා කැලණි ගඟ දෙපස රක්ෂිත කලාපය ඉක්මණින් ලකුණු කොට ගැසට් කිරීමට පියවර ගන්නා බව පරිසර අමාත්‍ය මහින්ද අමරවීර මහතා ලංකාදීපයට  පැවැසීය.

ගඟේ රක්ෂිත  කලාපයේ මායිම් ලකුණු කොට අනවසර පදිංචිකරුවන් ඉවත් කිරීමට පියවර ගන්නා බව ද අමාත්‍යවරයා කීය.

මෙම ප්‍රදේශයේ අනවසර පදිංචිකරුවන් ලෙස පැල්පත් විශාල සංඛ්‍යාවක් පවතින බවත් අනවසර පදිංචිකරුවන් ඉවත්කිරීමට පෙර ඔවුන් වෙනුවෙන් නාගරික සංවර්ධන අධිකාරිය හා එක්ව නිවාස සංකිර්ණයක් ඉදිකිරීමට පියවර ගන්නා බවත් අමරවීර මහතා ප්‍රකාශ කළේය.

කැලණි ගඟ ඔස්සේ පෑලියගොඩ සිට ඉහළට කළ නිරික්ෂණ චාරිකාවකින් පසු අමාත්‍යවරයා මේ බව හෙළි කළ අතර අඩු ආදායම් ලාභින් පමණක් නොව සමහර ස්ථානවල මහල් දෙක තුනකින් යුත් නිවාස පවා පසුපස කොටස ගඟට සිටින සේ ඉදිකර තිබු ඒවා ද නිරික්ෂණය කළ බව කියා සිටියේය.

රක්ෂිතය නම් කිරීමෙන් පසු පදිංචිකරුවන් ඉවත්කිරීමේ දී තරාතිරම නොබලා කටයුතු කරන බව ද හෙතෙම සඳහන් කළේය.

සමහර පිරිස් නිවසේ කසල බෑග්වල දමා ගඟට විසිකරන බවත් තම චාරිකාවේදී ද ගඟේ පාලමක් මත සිට කාන්තාවක් ගඟට බෑගයක් විසිකරනු දුටු බවත් අමාත්‍යවරයා පැවැසීය.

ගඟට අපදියර බැහැර කරන ස්ථාන 1374 ක් හඳුනා ගත් බවත් ඔවුන් වහා එය නතර නොකල හොත් ඔවුන්ට එරෙහිව අධිකරණ ක්‍රියාමාර්ග ගන්නා බවත් කී අමාත්‍යවරයා ලබන වසරේ ගංගා පිරිසිදු කිරීමේ ව්‍යාපෘතිය ආරම්භ කරන බව ද කීය.