(අජන්ත කුමාර අගලකඩ)

ශ්‍රී ලංකා පොදුජන පෙරමුණේ ජනාධිපතිවරණ අපේක්ෂක හිටපු ආරක්ෂක ලේකම් ගෝඨාභය රාජපක්ෂ මහතා සහ ශ්‍රී ලංකා නිදහස් පක්ෂයේ නියෝජිතයින් අතර විශේෂ හමුවක් පවත්වා තිබේ.

ශ්‍රී ලංකා නිදහස් පක්ෂය වෙනුවෙන් එක්සත් ජනතා නිදහස් සන්ධාන මහලේකම් මහින්ද අමරවීර, ශ්‍රිලනිප මහලේකම් දයාසිරි ජයසේකර සහ භාණ්ඩාගාරික ලසන්ත අලගියවන්න යන මහත්වරු එම සාකච්ඡාවට සහභාගී වුහ.

ශ්‍රිලනිපය හා පොදුජන පෙරමුණ අතර පැවැත්වෙන සාකච්ඡාවල ප්‍රගතිය සහ ඉදිරි දේශපාලන කටයුතු සම්බන්ධයෙන් එහිදී දිර්ඝ වශයෙන් සාකච්ඡා වී ඇත.

මේ සම්බන්ධයෙන් ලංකාදීපය කළ විමසුමකදී පිළිතුරු දුන් එක්සත් ජනතා නිදහස් සන්ධානයේ මහලේකම් මහින්ද අමරවීර මහතා සඳහන් කළේ ප්‍රතිපත්තිමය කාරණා සම්බන්ධයෙන් ගෝඨාභය රාජපක්ෂ මහතා සමඟ දිර්ඝ ලෙස සාකච්ඡා කළ බවයි.

ඉදිරි ආණ්ඩුවක දී ඇමැතිධූර සංඛ්‍යාව 30 කට සීමා කිරිම, මැතිවරණ ක්‍රමය වෙනස් කිරිම ආදී කාරණා සම්බන්ධයෙන් ද එහිදී සාකච්ඡා වූ බව කී අමරවීර මහතා එම සාකච්ඡා සුබවාදීව අවසන් වූ බව කීය.

ලබන සතියේ ද ගෝඨාභය රාජපක්ෂ මහතා සමඟ තවත් සාකච්ඡා වටයක් පැවැත්වීම බලාපොරොත්තු වන බවද ඔහු සඳහන් කළේය.

තමා ඇතුළු ශ්‍රිලනිප නියෝජිත පිරිස ගෝඨාභය රාජපක්ෂ මහතා හමුවී සාකච්ඡා කළැයි ජනාධිපති මෛත්‍රිපාල සිරිසේන මහතාගේ අනුමැතිය ඇතිව බවද හෙතෙම කීවේය.

මෙම සාකච්ඡාව පුරා පැය දෙකකට ආසන්න කාලයක් පැවැත්විණි.