(නිමල කොඩිතුවක්කු)

අත්‍යවශ්‍ය භාණ්ඩ ප්‍රවාහනය කරන ජංගම රථ සම්බන්ධයෙන් සොයා බැලීම සඳහා විශේෂ මෙහෙයුමක් ක්‍රියාත්මක  බව පාරිභෝගික සේවා අධිකාරියේ පාරිභෝගික කටයුතු හා තොරතුරු අධ්‍යක්ෂ අසේල බණ්ඩාර මහතා ලංකාදීපයට පැවසීය.

ඒ අනුව සෑම දිස්ත්‍රික්කයකම ක්‍රියාත්මක ජංගම රථ සම්බන්ධයෙන් මෙහෙයුම් සිදුකරන බවත් වැඩි මිලට භාණ්ඩ අලෙවි කරන, පරිභෝජනයට නුසුදුසු ආහාර අලෙවි කිරීම, අඩු බරට භාණ්ඩ අලෙවි කිරීම ඇතුළු කරුණු සම්බන්ධයෙන් එහිදී විශේෂයෙන්ම සොයා බලන බවත් ඔහු සඳහන් කළේය.

මේ සඳහා සෑම දිස්ත්‍රික්කයක්ම ආවරණය වන පරිදි විශේෂ මෙහෙයුම් කණ්ඩායම් පත්කර ඇති බවත් අසේල බණ්ඩාර මහතා පැවසීය.

මෙලෙස වංචනික ක්‍රියාවන් සිදු කරන පුද්ගලයින් සම්බන්ධයෙන් නීතිමය ක්‍රියාමාර්ග ගැනීමට කටයුතු කරන බවත් ඔහු වැඩිදුරටත් සඳහන් කළේය.