(හර්ෂණ තුෂාර සිල්වා)

කිලිනොච්චිය සහකාර පොලිස් අධිකාරී ලෙස කටයුතු කරන සහකාර පොලිස් අධිකාරී කේ ඒ ජේ කුඩිතුවක්කු මහතා පොලිස් අධිකාරී නිලයට උසස් කිරීම සඳහා අද (29) රැස්වූ ජාතික පොලිස් කොමිෂන් සභාව අනුමැතිය ලබා දුන් බව පොලිස් කොමිෂන් සභාවේ ආරංචි මාර්ග කියයි. 
 
2016 ජනවාරි පළමු වැනි දා සිට ක්‍රියාත්මක වන පරිදි  පොලිස් අධිකාරී නිලයට උසස්වීම ලබා දී ඇතැයි ද කොමිසම සඳහන් කරයි.
 
සහකාර පොලිස් අධිකාරී කේ ඒ ජේ කොඩිතුවක්කු මහතා පොලිස් අධිකාරී නිලයට පත් නොකිරීම සම්බන්ධයෙන් ඒ මහතා පොලිස්පතිවරයාට හා ජාතික පොලිස් කොමිෂන් සභාවට අභියාචනයක් කර තිබුණු බවත්, එය සැලකිල්ලට ගනිමින් ඒ මහතා පොලිස් අධිකාරී නිලයට උසස් කිරීම පොලිස්පතිවරයා අනුමත කර නීතිය හා සාමය අමාත්‍යංශය හරහා ජාතික පොලිස් කොමිෂන් සභාවට එවා තිබුණු බවත් පොලිසිය පවසයි.
 
ඒ අනුව අද (29) රැස්වූ ජාතික පොලිස් කොමිසම එම උසස්වීම අනුමත කර තිබේ.
 
කොළඹ පොලිස් මූලස්ථානයේ පාතාල මර්දන ඒකකයේ ස්ථානාධිපති ලෙස මෙන්ම පොලිස් ස්ථාන ගණනාවක ස්ථානාධිපති ලෙස සේවය කර ඇති ඒ මහතා මතුගම, ගම්පහ, ත්‍රිකුණාමලය සහ කිලිනොච්චිය දිස්ත්‍රික්කවලට අනියුක්තව සහකාර පොලිස් අධිකාරීවරයකු ලෙස කටයුතු කර තිබෙන බවත්, පාතල මර්දන රාජකාරියේ යෙදී සිටිය දී ඒ මහතා වෙඩි ප්‍රහාරයකලට ලක්වූ අවස්ථාවක්ද තිබෙන බවත් පොලිස් කොමිෂන් සභාවේ ආරංචි මාර්ග කියයි.