(තිළිණි ද සිල්වා  සහ  රංජන් කටුගම්පොළ)

 

අඟුණකොළපැලැස්ස බන්ධනාගාරය තුළ රඳවා සිටි රැඳවියන්ට පහර දී වධහිංසාවලට භාජනය කිරීමේ සිද්ධිය පිළිබඳව පරීක්ෂණයක් පවත්වන ලෙස පොලිස්පතිවරයාට නියෝග කරන්නැයි ඉල්ලා සිරකරුවන් සුරැකීමේ සංවිධානයේ ලේකම් සුදේශ් නන්දිමාල් ද සිල්වා මහතා විසින් අද (22) අභියාචනාධිකරණයට රිට් පෙත්සමක් ගොනු කරන ලදී.

එහි වගඋත්තරකරුවන් ලෙස අධිකරණ අමාත්‍ය  තලතා අතුකෝරාල, පොලිස්පතිවරයා, රහස් පොලිසියේ අධ්‍යක්ෂවරයා, අගුණුකොළපැලැස්ස බන්ධනාගාරය අධිකාරීවරයා සහ බන්ධනාගාර කොමසාරිස් ජනරාල් ඇතුළු අට දෙනෙකු නම් කර තිබේ.

නීතීඥ සේනක පෙරේරා මහතා විසින් ගොනු කර ඇති පෙත්සමේ මෙසේ ද සඳහන් වේ.

අගුණුකොළපැලැස්ස බන්ධනාගාරය තුළ රඳවා සිටි සිරකරුවන්ට විවිධ වධ හිංසා කිරීමේ සිද්ධිය පිළිබඳ සී.ඩී.තැටිය පෙත්සම්කරුගේ සංවිධානයට ලැබිණි. ඉන්පසු ඒ පිළිබඳව පෙත්සම්කරු අපරාධ පරීක්ෂණ දෙපාර්තමේන්තුවට පැමිණිල්ලක් කළේය. පසුව මේ සිද්ධිය පිළිබඳ පරීක්ෂණ පැවැත්වීම කමිටුවක් පත්කර ඇති බවද දැනගන්නට ලැබිණි.

එහෙත් මෙතෙක් කිසිදු පියවරක් ඉටු වී නැත.

එබැවින් අදාළ සිද්ධිය පිළිබඳ පුළුල් පරීක්ෂණ පවත්වන ලෙස පොලිස්පති ඇතුළු වගඋත්තරකරුවන්ට රිට් ආඥාවක් නිකුත් කරන ලෙස පෙත්සම්කරු සිය පෙත්සමෙන් ඉල්ලා ඇත.