(නිමල කොඩිතුවක්කු)

පාස්කු ඉරිදා ප‍්‍රහාරය සම්බන්ධයෙන් අග‍්‍රාමාත්‍ය රනිල් වික‍්‍රමසිංහ මහතා සිය වගකීම පැහැර ඇති බව පවසමින් ඒ මහතාට එරෙහිව ජාතික සංඝ සම්මේලනය විසින් අද (14) පොලිස් මූලස්ථානය වෙත පැමිණිල්ලක් ඉදිරිපත් කරනු ලැබීය.

පාස්කු දා ප‍්‍රහාරය සම්බන්ධයෙන් තොරතුරු දැන සිටියත් ඒ පිළිබඳ ක‍්‍රියා නොකිරීම, ආණ්ඩුව පිළිබඳ තමන්ගේ වගකීම පැහැර හැරිම ආදී කරුණු රැසක් මුල්කර ගනිමින් මෙම පැමිණිල්ල ගොනු කළ බව ජාතික සංඝ සම්මේලනයේ සම සභාපති රජවත්තේ වප්ප හිමියෝ එහිදී පැවැසූහ.

මෙම චෝදනා සම්බන්ධයෙන් අග‍්‍රාමාත්‍ය රනිල් වික‍්‍රමසිංහ මහතා අත්අඩංගුවට ගෙන නීතිය ක‍්‍රියාත්මක කරන ලෙසද උන්වහන්සේ  සිය පැමිණිල්ල මගින් තවදුරටත් ඉල්ලා සිටියි.

පොලිස් මූලස්ථානය වෙත පැමිණිල්ල ඉදිරිපත් කිරීමෙන් පසු මාධ්‍ය හමුවේ තවදුරටත් අදහස් දැක්වූ රජවත්තේ වප්ප හිමියෝ මෙසේ ද කීහ.

‘‘ අගමැතිට එරෙහිව පොලිස් මූලස්ථානයට  අපි පැමිණිල්ලක් ඉදිරිපත් කළා. පාස්කු ඉරිදා ප‍්‍රහාරයන් නිසා මේ වනවිට 250කට වඩා පිරිසක් ජීවිතක්ෂයට පත්වුණා. ඒ වගේම 500කට අධික පිරිසක්  තුවාල ලැබුවා.

දශක තුනක ත‍්‍රස්තවාදයක්  නැති කරලා මේ රට තුළ සාමය, සමෘද්ධිය ඇතිවෙලා ජනතාව සාමයෙන් සතුටින් ජීවත් වන කාලයක මේ සා විශාල විනාශයක්  වීමට ප‍්‍රධානතම හේතුව රටේ ආරක්ෂාවක් නොතිබීමයි. ඒ නිසා මේ රටේ ජාතික  ආරක්ෂාව නැති කිරිම පිළිබඳ මූලිකව වගකිව යුත්තේ මේ රටේ අග‍්‍රාමාත්‍යවරයායි.

ඒ නිසා අග‍්‍රාමාත්‍යවරයා වහාම අත්අඩංගුවට ගෙන නීතිය ක‍්‍රියාත්මක කරන ලෙසට ජාතික සංඝ සම්මේලනය විදියට අපි පැමිණිල්ලක් ඉදිරිපත් කළා’’යැයිද උන්වහන්සේ එහිදි පැවැසූහ.

මෙම අවස්ථාව සඳහා ජාතික සංඝ සම්මේලනයේ මාධ්‍ය ලේකම් වත්තහේනේ විජිත හිමියෝ ඇතුළු පිරිසක් එක්වූහ.

ඡායාරූප - ශාන්ත රත්නායක