(දඹුල්ල කාංචන කුමාර ආරියදාස)

වැව්වල ජලය සිඳීයාමත් සමග ගොඩට ආ දැවැන්ත කිඹුලෙකුට කිසියම් පිරිසක් විසින් පහර දී හිස ප්‍රදේශයට බරපතල තුවාල සිදුව තිබියදී අද (22) සීගිරිය වනජීවී නිලධාරීන්ට කිඹුලාගේ ජීවිතය බේරා ගැනීමට හැකිවිය. 

දඹුල්ල බුලාගල වැව ආසන්නයේ හිසේ දැඩි තුවාල සහිතව සිටි මෙම කිඹුලා පිළිබඳව දඹුල්ල මූලස්ථාන පොලිස් පරීක්ෂක සම්පත් වික්‍රමරත්න මහතාට ලැබුණු තොරතුරක් මත දඹුල්ල පොලිස් ජීවිතාරක්ෂක ඒකකයේ ස්ථානාධිපති පොලිස් සැරයන් සුනිල් විජේසිංහ මහතා ඇතුළු කණ්ඩායමක් එම ස්ථානයට යවා ඒ පිළිබඳව සොයා බලා පසුව සීගිරිය වනජීවී නිලධාරීන්ට මෙම කිඹුලාගේ තත්ත්වය පිළිබඳව දැනුම් දී තිබිණි.

මේ දිනවල වනජීවී නිලධාරීහු වෘත්තීය සමිති ක්‍රියාමාර්ගයකට එළඹ පැය අටේ සේවයේ නිරතව සිටින නමුත් සෙනසුරාදා නිවාඩු දින ඒ ඔවුන් මෙම කිඹුලාගේ ජීවිතය බේරා ගැනීම සඳහා වෘත්තීය සමිති ක්‍රියාමාර්ගය මඳකට අමතක කර එම ස්ථානයට පැමිණ තුවාල වී අසරණව සිටී කිඹුලා අල්ලාගෙන  ප්‍රරතිකාර කිරීම සඳහා ඇරගෙන යන්නට වූහ.

සීගිරිය වනජීවී නිලධාරීහු කියා සිටියේ මෙම කිඹුලා මින්නේරිය වනජීවි කාර්යාලයට රැගෙන ගොස් ප්‍රතිකාර කිරීමෙන් පසු වනයට මුදා හැරීමට නියමිත බව ය.