(අජන්ත කුමාර අගලකඩ)  

ලබන අප්‍රේල් මස අගදී පැවැත්වෙන මහ මැතිවරණයට පොදුජන පෙරමුණ හා ශ්‍රීලනිපය එක්ව පිහිටුවන සන්ධානයේ නම කුමක් වුවද ලකුණ පොහොට්ටුවම විය යුතු බවට පොදුජන පෙරමුණේ බහුතරයකගේ අදහස වී ඇතැයි දැනගන්නට ඇත.   

ඔවුන් මේ බව පක්ෂයේ නායක අගමැති මහින්ද රාජපක්ෂ මහතාට දැනුම්දී ඇතැයිද එම පක්ෂයේ ප්‍රකාශකයෙක් සඳහන් කළේය.   

මහා මැතිවරණයට ශ්‍රී ලංකා පොදුජන පෙරමුණත්, ශ්‍රී ලංකා නිදහස් පක්ෂයත් සෙසු දේශපාලන පක්ෂත් ශ්‍රී ලංකා නිදහස් පොදුජන සන්ධානය නමින් තරග කිරීමට දැනටමත් එකඟතාවය පළකර ඇති නමුත් ලකුණ සම්බන්ධයෙන් අවසන් එකඟතාවයකට පැමිණ නැතැයි වාර්තාවේ.     

නව සන්ධානය පිහිටුවීම සඳහා කලින් පැවැති පොදුජන එක්සත් පෙරමුණ ශ්‍රී ලංකා නිදහස් පොදුජන සන්ධානය ලෙසට වෙනස් කිරීමට පොදුජන පෙරමුණු ව්‍යවස්ථාව සංශෝධනය කිරීමටත් හිටපු ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඉකුත් බ්‍රහස්පතින්දා පැවැති පොදුජන පෙරමුණේ විධායක සභාවේදී තීරණය කර තිබිණ.   

ඒ අනුව නව සන්ධානය ලියාපදිංචි කිරීම සඳහා විධායක සභාව ගත් තීරණය මෙම සතියේදී මැතිවරණ කොමසාරිස්වරයා වෙත දැන්වීමටද එහිදී තීරණය කර තිබිණි.   
අලුතින් පිහිටුවන සන්ධානයේ කෙටුම්පතක්ද ඇමැති නිමල් සිරිපාල ද සිල්වා මහතා විසින් පොදුජන පෙරමුණේ විධායක සභාවට ඉදිරිපත් කරනු ලැබ ඇත.   

මේ අතර සන්ධානයේ මහලේකම් ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතාට ලබාදිය යුතු බවටද පොදුජන පෙරමුණේ පාර්ශ්වයෙන් යෝජනාවී ඇත.   

ඉදිරියේදී පිහිටුවන පොදුජන පෙරමුණේ සම නායකයන් ලෙස අගමැති මහින්ද රාජපක්ෂ හා හිටපු ජනාධිපති මෛත්‍රීපාල සිරිසේන මහත්වරුන් පත් කිරීමට යෝජනාවී ඇත.   
මහලේකම් ධුරය හා භාණ්ඩාගාරික ධුරයන් පොහොට්ටුවට හිමිවිය යුතු බව යෝජනාවී ඇති අතර නියෝජ්‍ය ලේකම් ධුරය හා ජාතික සංවිධායක ධුරය ශ්‍රී ලංකා නිදහස් පක්ෂයට ලබාදීමටද යෝජනාවී ඇත.   

එමෙන්ම උප ලේකම් ධුරය හා උප සභාපති ධුරයන් සන්ධානයේ සෙසු පක්ෂවලට ලබාදීමට ද යෝජනාවී ඇත.   

නව සන්ධානයේ විධායක සභාවට සාමාජිකයන් පත් කිරීමේදී සියයට 52ක් පොදුජන පෙරමුණට හා සියයට 32ක් ශ්‍රී ලංකා නිදහස් පක්ෂයට ලබාදීමට යෝජනාවී ඇති අතර සියයට 18ක් සන්ධානයේ සෙසු පක්ෂවලටත් ලබාදීමට යෝජනාවී ඇත.   

නව සන්ධානය පිහිටුවීම හා ලකුණ සම්බන්ධයෙන් අවසන් තීරණයක් ගැනීම බැසිල් රාජපක්ෂ මහතා ලබන සතියේදී දිවයිනට පැමිණීමෙන් පසුව සිදු කිරීමට තීරණය වී ඇතැයිද වාර්තාවේ.