ඇමෙරිකාවේ කැලිෆෝනියා ප්‍රාන්තයේ පිහිටි සැන් ෆ්‍රැන්සිස්කෝ නුවර, සති තුනක කාලයකට වසා දැමීමට බලධාරීන් තීරණය කර තිබේ.

ඒ අනුව, අද මධ්‍යම රාත්‍රියේ සිට පුද්ගලයන්ට සිය නිවාසවලින් පිටවයාම තහනම් ය. එසේ වුවත්, වෛද්‍යවරුන් නිවසට කැඳවන්නේ නම් හෝ ආහාර මිලදීගැනීමට යන්නේ නම් ඊට අවසර ඇත.

සැන්ෆ්‍රැන්සිස්කෝ නුවර වසාදැමීමත් සමඟ ම, ඒ ආශ්‍රිතව ඇති තවත් පළාත් 6ක වෙසෙන මහජනයාටද  සුරක්ෂිත ස්ථානවල රැඳී සිටින ලෙස දැනුම් දී තිබේ.

ඇමෙරිකාවේ ප්‍රාන්තයක් හෝ පළාතක් හෝ නගරයක් වසාදැමීම යනු, දැඩි පියවරක් බවත්, කිසිවකු හෝ මෙම උපදෙස් පිළිනොපදින්නේ නම්, නීතිමය පියවර ගන්නා බවත් නිලධාරීහු සඳහන් කරති.

“මෙය තීරණාත්මක අවස්ථාවක්. අපිට වගකීමක් තියෙනවා, අපේ කොටස හරියට කරන්න. අපේ අසල්වැසියන් ආරක්ෂා කරන්න. එවැනි දෑ කිරීමෙන් වයිරසය ආසාදනය වීම වළක්වන්න. ඒනිසා අත්‍යවශ්‍ය ම දෙයකට හැර වෙනත් කිසිදු කටයුත්තක් වෙනුවෙන් නිවාසවලින් බැහැරවෙන්න එපා” යැයි ඔවුහු පවසති.

මේ අතර, ඇමරිකා එක්සත් ජනපදය සම්පූර්ණයෙන්ම වසා දැමීමේ, එනම් රටේත්, ආයතන සහ කාර්යාලවලත් සියලු දොරටු වසා දැමීමේ තීරණයට යාමට ඔන්න මෙන්න කියා තිබියදී ජනාධිපති ට්‍රම්ප් මහතා නතර වී තිබේ. ඊට හේතුව වී ඇත්තේ මෙම වයිරසය පැතිරීම පාලනය කිරීම සඳහා පරිපාලනමය විසඳුමක් යොදන්න‘යි ප්‍රාන්ත ආණ්ඩුකාරවරුන් සහ නගරාධිපතිවරුන්ගේ විවේචනය. 

ඊයේ ධවල මන්දිරයේ දී පුරවැසියන් අමතමින් ජනපතිවරයා පැවසුවේ, පුද්ගලයන් 10 දෙනෙකු හෝ ඊට වැඩි ප්‍රමාණයක් වශයෙන් රැස්නොවන ලෙසය. එසේම, ආපනශාලා, මත්පැන්හල් සහ වෙළඳසැල් වෙත නොයන ලෙස පැවසූ ජනපතිවරයා ඇමෙරිකාවේ සියලු දොරටු වසාදැමීමේ තීරණයක් ගෙන නැති බව සඳහන් කළේය.

නිව්යෝක්, නිව්ජර්සි සහ කනෙක්ටිකට් යන ප්‍රාන්ත බලධාරීන් සිය ප්‍රාන්ත තුනෙහි ම මත්පැන් අවන්හල්, ව්‍යායාම් මධ්‍යස්ථාන, සිනමාශාලා සහ ආපනශාලා සඳුදා රාත්‍රී 8.00 සිට වසාදැමීමට පියවර ගෙන ඇත.

නිව් ජර්සි ප්‍රාන්තයේ රාත්‍රී 8.00 සිට පසුදා පාන්දර 5.00 දක්වා ඇඳිරි නීතිය ක්‍රියාත්මක කිරීමටද, අනවශ්‍ය ගමන් නවතාදැමීමට ද  බලධාරීහු පියවර ගත්හ.