කොරෝනා වයිරසය ආසාදනය වූ පුද්ගලයකු පමණක් අද වූහාන් නගරයෙන් වාර්තා වූ බව චීනය අනාවරණය කරයි.

චීනය මේ වනවිට වයිරසය සාර්ථකව පාලනය කිරීමට පියවර ගනිමින් සිටින බැවින් නිවසක සිටි චීනවැසියකුට පමණක් අද වයිරසය ආසාදනය වීම දක්වා ආසාදිතයන් සංඛ්‍යාව අඩුකරගෙන තිබේ.

එහෙත් විදේශයෙන් පැමිණි පුද්ගලයන් 20දෙනෙකුට වයිරසය ආසාදනය වී ඇති බව හඳුනාගෙන ඇත.

සාමාන්‍යයෙන් දිනපතා චීනයට ගුවන් මගීහු 20,000ක් පමණ පිරිසක් පැමිණෙති.

එම ගුවන් මගීන්ට සති 2ක කාලයක් හෝටල්වලට වී කාලය ගතකරන ලෙස උපදෙස් ලබාදී ඇති බව බීජිංහි බලධාරීහු කීහ.

චීනය අද දිනයේදී මරණ 13ක් වාර්තා කළ අතර, මේ වනවිට මිය ගිය පුද්ගලයන් සංඛ්‍යාව 3,226 දක්වා ඉහළ ගොස් තිබේ. පුද්ගලයන් 80,881දෙනෙකුට වයිරසය ආසාදනය වී ඇත.

ලොව  පුරා ආසාදිතයන් 181,500දෙනෙකු ද, මිය ගිය පුද්ගලයන් 7,000ක්ද වාර්තා වන අතර, රටවල් 145කට වයිරසය ව්‍යාප්තව ඇත.