එෆ්.අස්ලම්

කොවිඩ් 19 වයිරසය ආසාදිතයින් වාර්තා වූ වැලිසර නාවික හමුදා කදවුරෙන් (24)වනදා නිවාඩු ලබා පැමිණි බදුල්ල  දිස්ත්‍රීක්කයේ නාවික හමුදා සාමාජිකයින් 31දෙනෙකු නීරෝධායනය සදහා යොමු කිරීමට පියවර ගනිමින් සිටින බව පොලිසිය සහ ප්‍රදේශයේ සෞඛ්‍ය අංශ  සදහන් කරයි.

එලෙස පැමිණි නාවික හමුදා සාමාජිකයින් පිරිස අතරින් ස්ප්‍රීංවැලි, ගිරාදුරුකෝට්ටේ සහ රිදීමාලියද්ද ප්‍රදේශවල පදිංචි නාවික හමුදා සාමාජිකයින් 3 දෙනෙකු අතරින් දෙදෙනෙකු කොවිඩ් 19  දියතලාව නීරෝධායන මධ්‍යස්ථානය වෙතත් උණ රෝගී තත්වයෙන් පෙළුණු අයෙකු බදුල්ල පළාත් මහ රෝහලේ කොවිඩ් 19 ප්‍රතිකාර මධ්‍යස්ථානයටත් ඊයේ (25) ඇතුළු කර ඇතැයි බදුල්ල පළාත් මහ රෝහලේ ජ්‍යෙෂ්ඨ ප්‍රකාශකයකු සදහන් කළේය.

නිවාඩු ලබා පැමිණි   වැලිසර නාවික හමුදා කදවුරේ නාවිකයින් 31 දෙනෙකු පමණ පිරිසක් රැගත් බස් රථයක් පෙරේදා(24)වනදා   බදුල්ල කරා පැමිණ ඇති අතර ඒ කණ්ඩායම  හා පැමිණි   නාවික හමුදා සාමාජිකයෙකුට කොරෝනා රෝග ලක්ෂණ සහිතව  රෝහල්ගත කිරීමත්  සමග ඔහු හා බසයේ පැමිණි සෙසු නාවික සාමාජිකයින් 30 දෙනෙකු සොයා   නීරෝධායනය කරවීමට පොලිසිය හා සෞඛ්‍ය බලධාරීන් කටයුතු කරමින් සිටයි.

මෙලෙස පැමිණි නාවිකයින් අතරින් නාවික හමුදා සාමාජිකයින්  පිරිසක් මේ වන විටත් හදුනාගෙන තිබෙන බවත් ඔවුන් අතරින් දෙදෙනෙකු සෞඛ්‍ය බලධාරීන් හා එක්ව ඊයේ (25)  නීරෝධායනය සදහා යොමුකළ බවත් සෙසු පිරිසද සොයා ගනිමින් කඩිනමින් නීරෝධායනය සදහා යොමුකරන බවත්   බදුල්ල ප්‍රදේශය බාර උසස් පොලිස් නිලදාරියකු  සදහන් කළේය.

නාවික හමුදා බසයෙන් පැමිණ බදුල්ල නගරයෙන් බැස සිටි නාවික හමුදා සාමාජික පිරිස  පෙරේදා(24) දහවල්    නගරයේ සැරි සරා ඇති බවද හෙලිවී ඇති බව එම නිලදාරියා කීය.

සෞඛ්‍ය උපදෙස් අඛණ්ඩව පිළිපදිමින් ආරක්ෂාකාරීව කටයුතු කරන්නැයි පොලිසිය හා සෞඛ්‍ය අංශ  මහජනතාවගෙන් ඉල්ලා සිටියි.