රුසියානු අග්‍රාමාත්‍ය මිහායිල් මිෂුස්ටින් මහතාට කොරෝනා වයිරසය ආසාදනය වී ඇතැයි තහවුරු වී තිබේ.

ඔහු පසුගිය ජනවාරි මාසයේ සිට අග්‍රාමාත්‍ය ධූරයේ කටයුතු කරන අතර වයිරසයට ආදාළ කටයුතු මෙහෙයවීමට හෙතෙම සක්‍රීයව දායක වුණි.

රුසියානු ජනපති ව්ලැඩිමීර් පුටින් මහතා සමඟ වීඩියෝ ඇමතුමකින් සම්බන්ධ වෙමින් ඔහු සිය අසනීප තත්ත්වය පිළිබඳ ජනාධිපතිවරයාට දැනුම් දී ඇත.

නියෝජ්‍ය අග්‍රාමාත්‍ය අන්ද්‍රෙයි බෙලසොව් මහතා තම ස්ථානය ගනිමින් කටයුතු කිරීම සුදුසු බවට මිෂුස්ටින් මහතා කළ යෝජනාවට රුසියානු ජනපතිවරයා එකඟ වී තිබේ.

අගමැතිවරයා මේ වන විට ස්වයං නිරෝධානයට යොමු වී ඇති අතර කොරෝනා වයිරසය ආසාදනය වූ රුසියාවේ ප්‍රථම ජ්‍යෙෂ්ඨ දේශපාලඥයා ඔහුය.

ජෝන්ස් හොප්කින්ස් විශ්වවිද්‍යාලයේ සංඛ්‍යාලේඛන අනුව මේ වන විට රුසියාවෙන් හඳුනාගෙන ඇති කොරෝනා වයිරසය ආසාදිත රෝගීන් සංඛ්‍යාව 106,498 කි.

එරටින් වාර්තා වී ඇති මරණ සංඛ්‍යාව 1,073 කි.

-226-
(බීබීසී ඇසුරෙනි)