2022 ජනවාරි මස 21 වන සිකුරාදා
( තිළිණි ද සිල්වා )
සිය රැකියා අහිමිව රුමේනියාවේ බුඩාරෙස්ට් ගුවන් තොටුපළේ අතරමංව සිටි ශ්‍රී ලාංකික සේවකයන් 36 දෙනා සඳහා තව දුරටත් එහි රැදී සිටිමින් නව රැකියාවන් ලබා දීමට එරට කම්කරු අමාත්‍යවරිය පියවර ගෙන ඇතැයි විදේශ කටයුතු අමාත්‍යාංශය කියා සිටී.
මීට පෙර මෙම ශ්‍රී ලාංකික සේවකයන් සේවය කළ ආයතනයේ බොහෝ පිරිසක් කොරෝනා ආසාදිතයින් බවට සැක කරන බව සොයා ගැනීම හේතුවෙන්, එම ආයතනයේ සේවය කිරීම මෙම පිරිස ප්‍රතික්ෂේප කිරීමත් සමග ඉකුත් අප්‍රේල් මාසයේදී රැකියා අහිමි වූහ.
කෙසේ වෙතත් එරට කම්කරු අමාත්‍ය වයොලෙමා ඇලෙක්සැන්ඩෘ මහත්මියගේ මැදිහත් වීම මත යළිත් මෙම ලාංකිකයින්ට නව රැකියාවන් ලැබී ඇති අතර මේ අනුව රොමේනියාවේ රැකියාවල අඛණ්ඩව නියැලීමට හැකි වන පරිදි ශ්‍රී ලාංකික සේවකයින් 36 දෙනෙකුට විකල්ප සේවා යෝජකයෙකු ලබා දී තිබෙන බව ඊයේ රොමේනියානු රජය පෝලන්තයේ ශ්‍රී ලංකා තානාපති කාර්යාලයට දන්වා තිබේ.
මෙම කාරණය මිත්‍රශීලීව සමථයකට පත් කිරීමට රොමේනියානු රජය විසින් ගෙන ඇති මෙම ක්‍රියාව අමාත්‍ය දිනේෂ් ගුණවර්ධන මහතා ප්‍රශංසාවට ලක් කල බවද විදේශ අමාත්‍යාංශය කියා සිටී
රුමේනියාව සඳහා අක්ත ගන්වා ඇති වෝර්සොහි පිහිටි ශ්‍රී ලංකා තානාපති කාර්යාලය, මෙම ශ්‍රී ලාංකිකයන් සදහා ඉඳුම් හිටුම් පහසුකම් හා වෙනත් අවශ්‍යතා සැපයීම සඳහා රොමේනියාවේ කම්කරු අමාත්‍යාංශයේ හා වෙනත් සංවිධානවල පහසුකම් ලබා ගනිමින් තවදුරටත් ක්‍රියා කරමින් සිටින බවද එම අමාත්‍යාංශය කියා සිටී.
