නව කොරෝනා වයිරසයේ ව්‍යාප්තිය පාලනය කිරීම සඳහා සති දෙකකට කාලයක් රටේ අත්‍යවශ්‍ය සේවා හැර රටේ සියලු කටයුතු නවතා දැමීමට පියවර ගන්නා බව මැලේසියාවේ අග්‍රාමාත්‍ය මුහිදින් යසීන් නිවේදනය කළේය.

හෙට (18) සිට ක්‍රියාත්මක වන පරිදි විදේශිකයන්ට රටට ඇතුළුවීම තහනම් යැයි ද මැලේසියානු ජාතිකයන්ට රටින් පිටවීම තහනම් යැයි ද මැලේසියානු අග්‍රාමාත්‍යවරයා කීවේය.

විදෙස්ගතව සිට රටට පැමිණෙන සියලු දෙනා දින 14ක අනිවාර්ය නිරෝධායන ක්‍රියාවලියට යොමු කිරීමට මැලේසියානු බලධාරීහු පියවර ගෙන ඇත.

ආගමික කටයුතු ඇතුළු මහජනතාව එක්රැස් වන උත්සව ආදී සියල්ල කල් දැමීමටත් අත්‍යවශ්‍ය ද්‍රව්‍ය අලෙවි කරන කඩසාප්පු හැර අනෙකුත් සියල්ල වසා දැමිය යුතු බවත් මැලේසියානු අග්‍රාමාත්‍යවරයා ප්‍රකාශ කළේය. පාසල් වසා දමන්නැයි ද මැලේසියානු බලධාරීහු ප්‍රකාශ කළහ.

විශේෂ ප්‍රකාශයක් කරමින් මැලේසියානු අග්‍රාමාත්‍යවරයා එම කරුණු සඳහන් කළ අතර එය එරට රූපවාහිනි නාලිකා ඔස්සේ විකාශය ද කෙරුණි.

මැලේසියාවේ රෝග පාලන සහ ආරක්ෂණ පනත සහ පොලිස් පනත ක්‍රියාත්මක කරන බවත් ඒ අනුව සංචාරක සීමා පනවන බව ද අග්‍රාමාත්‍යවරයා කීවේය.

‘‘ආණ්ඩුව ගෙන ඇති පියවර ඔබට ඔබගේ දෛනික ක්‍රියාකාරකම්වලට බාධාවක් වෙන්න පුළුවන්. ඔබට විවිධ දුෂ්කරතා සහ අභියෝගවලට මුහුණ දෙන්න වේවි. එහෙත් වයිරසය ව්‍යාප්ත වීම වැළැක්වීමටත් ඔබේත් මගේත් ජීවිත ආරක්ෂා කරගැනීමට මේ ක්‍රියාකාරකම් ගන්න වෙනවා’’ යැයි මැලේසියානු අග්‍රාමාත්‍යවරයා කීවේය.

මැලේසියාවෙන් වාර්තාවන කොරෝනා ආසාදිතයන්ගේ සම්පූර්ණ ගණන 553කි. අග්නිදිග ආසියානු රටකින් වැඩිම කොරෝනා ආසාදිතයන් වාර්තා වී ඇත්තේ ද මැලේසියාවෙනි.

ඒ.එෆ්.පී./රොයිටර්

055