චීනය කොරෝනා මරණ රහිත පළමු දිනය වාර්තා කරයි

කොරෝනා වසංගතය ව්‍යාප්ත වීම ආරම්භ වීමෙන් පසු ප්‍රථම වතාවට චීනයේ අද(07) කොරෝනා ආසාදිත මරණ කිසිවක් වාර්තා නොවූ බව එරට බලධාරීහු පවසති.
 
චීන ජාතික සෞඛ්‍ය කොමිසම පවසන්නේ සඳුදා වාර්තා වූ රෝගීන් සංඛ්‍යාවට වඩා අද වාර්තා වූ රෝගීන් සංඛ්‍යාව ද අඩු වී ඇති බවයි.
 
සඳුදා(06) රෝගීන් 39ක් වාර්තා වී ඇති අතර අද වාර්තා වී ඇත්තේ රෝගීන් 32කි.අද වාර්තා වූ සියලුම රෝගීන් විදේශයන්හි සිට පැමිණි අය බවද සඳහන් වේ.
 

"මරණ රහිත පළමු දිනය" චීනයට පමණක් නොව ලෝකයටම නව බලාපොරොත්තුවක් ඇති කරන බවට සැකයක් නැතැයි සෞඛ්‍ය කොමිසම පවසයි.
 
කොරෝනා වයිරසය හේතුවෙන් චීනයේ 3 331කට වැඩි පිරිසක් මියගිය අතර 81 740කට රෝගය ආසාදනය විය.
 
ජනවාරි මාසයේ සිට අගුලු දමා ඇති වුහාන් නගරයේ ජනතාවට බදාදා (08) සිට නගරයෙන් පිටවීමට අවසර දීමට සැලසුම්කර ඇති බව නගර බලධාරීහු පවසති.
 
ජංගම දුරකථන වලට බොහෝ දෙනා ලබාගෙන ඇති සෞඛ්‍ය යෙදුමක (health app) "හරිත" කේතය සටහන් වන ඕනෑම අයෙකුට නගරයෙන් පිටවීමට අවසර දෙන බව නිලධාරීහු පවසති.

වසංගත අවදානමෙන් තොර කළාපයේ නේවාසිකාගාර වල සිටින අයට පැය දෙකක කාලයකට පිටතට යෑමට අවසර දී තිබේ.
  
විදේශීය සංචාරකයන් විසින් නැවතත් ආසාදන රැල්ලක් ඇති කරනු ඇතැයි අනතුරු අඟවා ඇති හෙයින් විදේශිකයින් සඳහා දේශ සීමා වසා දමා ඇති අතර දැඩි නීති රීති ක්‍රියාත්මක වේ. 
 
(බීබීසි ඇසුරිණි - 085)