(ඩිල්ෂානි චතුරිකා දාබරේ)

කොරෝනා වයිරසය පරාජය කළ දිනයක, එහි අගය පළමුව ලැබිය යුත්තේ, ජනපතිවරයාට සහ අගමැතිවරයාට බවත්, එහි වීර පදක්කම ලබාදිය යුත්තේ අයිඩීඑච් රෝහලේ සමස්ත කාර්ය මණ්ඩලයට බවත් සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මිය අද(08) පැවසුවාය.

ඒ මහත්මිය මේ බව පැවසුවේ, අංගොඩ ජාතික බෝවන රෝග විද්‍යායතනයේ හෙද කාර්ය මණ්ඩලයට රුපියල් මිලියන 15 ක පමණ වටිනාකමකින් යුතු පරිත්‍යාගයක් ලෙස ලැබුණු අංග සම්පූර්ණ නව හෙද නේවාසිකාගාරය, රෝහල වෙත ප්‍රදානය කිරීමේ අවස්ථාවට එක්වෙමිනි.

එහිදී අදහස් දැක්වූ අමාත්‍යවරිය වැඩිදුරටත් මෙසේද පැවසුවාය.

“අයිඩීඑච් රෝහල අපේ රටට තිබෙන විශාල සම්පතක්. එහි අධ්‍යක්ෂතුමා සියලු කණ්ඩායම් ඒ්කරාශි කරගෙන ලබාදෙන නායකත්වය අතිවිශාලයි“

“කෙදිනක හරි මේ රටේ කෝවිඩ්-19 පැරදුවේ කොහොමද කියලා කථාව ලියන කොට පළමුව ජනාධිපතිතුමාගේ නම සහ අගමැතිතුමාගේ නම ලියවෙන්නට ‍ඕනි. ජනපතිතුමා ජාතික නායකත්වයක් ලබාදුන්නා. හැමවෙලේම විශේෂඥ වෛද්‍ය මතයට කන්දෙමින් තීන්දු තීරණ ගැනීමේ ක්‍රියාවලියට එතුමා සහ අගමැතිතුමා කටයුතු කරපු නිසා තමයි තවමත් ජනතාව අතර මේ වෛරසය පැතිරීම වළක්වා ගැනීමට හැකිවී තිබෙන්නේ.“

“ඊළගට වීරයෝ විදිහට පදක්කම් දෙන්න ඕනි නම කියවෙන්නේ නැති මේ වැඩේ හරියටම කරපු අයිඩීඑච් රෝලේ විශේෂඥ වෛද්‍යතුමන්ලා, වෛද්‍යවරු, හෙදියන්, පරිපුරක වෛද්‍ය සේවා ඇතුලු සියලු රෝහල් කාර්ය මණ්ඩලයටයි. පළමු රෝගියා පැමිණි වෙලාවේ සිට විටෙන් විට මම මේ රෝහලට පැමිණියේ රෝහල් කාර්ය මණ්ඩල ධෛර්යමත් කිරීමටයි. මම කියන්නේ ඔවුන් මිහිපිට දෙවිවරු කියලයි.“

“සෞඛ්‍ය සේවය හදනවා නම් අපි මේවාට තමයි ගරු කරන්න ඕනි. මේ කාර්ය මණ්ඩලවලට තමයි ගරු කරන්න ඕනී. සෞඛ්‍ය ක්ෂේත්‍රය එහෙම වුනොත් ඉදිරියට ගෙන යා හැකියි. නිවෙස් වලට නොගොස් විශාල කැපකිරීම් කර, මානසික පීඩනය මැද ඔවුන් සේවාවන් කළා. මේක තමයි කරළියේ නොපෙනෙන වීරයන්ගේ කතාව“

“දෑත් පිරිසිදු කර ගනිමින් සමාජ දුරස්ථභාවය තබාගනිමින් කටයුතු කළා නම් මේ ලෙඩේ ව්‍යාප්ත වෙන්නේ නැහැ. කෙටි කලකින් මුළු ලෝකයම බිලිගත් මෙම රෝගයට බය නැතිව මුහුණ දෙන ශ්‍රී ලාංකීය ගුණය අපි මේ රෝහල තුලින් දැක්කා. අපේ රටේ තිබෙන එම ගුණය ලෝකයට පෙන්නපු, රටේ ජනතාව ආරක්ෂා කළ ඔබට අපේ ස්තූතිය පුද කරනවා. රටේ සියලු ජනතාව මගේ දරුවෝ කියන නායකයෙක් අද අපට ඉන්න නිසා මේ රටේ අනාගතය සුන්දර වෙයි. අද තිබෙන මේ තත්ත්වය රටෙන් දුරු වෙන්න කියලා අපි අධිෂ්ඨාන කරනවා. ජනාධිපතිතුමාගේ නායකත්වය යටතේ එය අපට සිදු කළ හැකියි. අපි ශ්‍රී ලාංකිකයෝ විදිහට නැගිටිනවා” යැයිද ඒ මහත්මිය කීවාය.