(කාංචන කුමාර ආරියදාස)
 
දේශීය එළවළු ගොවියා ගේ සියලුම එළවළු තොග හෙට (11 ) දින දඹුල්ල ,ගලේවෙල ,නාවුල ,ලග්ගල ,හා විල්ගමුව යන ප්‍රදේශ වලදී  රජය විසින් මිලදී ගැනීමට තීරණය කළ බව රාජ්‍ය  පරිපාලන ස්වදේශ කටයුතු පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් මහතා පැවසීය .

අද (10) පස්වරුවේ විශේෂ මාධ්‍ය හමුවක් කැඳවමින් අමාත්‍යවරයා මේ බව කීය.

ආර්ථික මධ්‍යස්ථාන බොහොමයක් මේ වන විට වසා දමා තිබීම හේතුවෙන් ඉතා කූට ලෙස අහිංසක ගොවීන්ගේ භවභෝග ඉතා අඩු මුදලකට ලබාගෙන පාරිභෝගික ජනතාවට වැඩි මිල ගණන් යටතේ අලෙවි කිරීමේ ක්‍රමවේදයට තිත තැබීම සඳහා සහ විශාල වශයෙන් ගොවීන් තැන තැන අනාරක්ෂිත ලෙස ගැවසීම වැළැක්වීම සඳහා  ජනාධිපති ගෝඨාභය රාජපක්ෂ අග්‍රාමාත්‍ය මහින්ද රාජපක්ෂ යන මහත්වරුන් දෙදෙනා සාකච්ඡා කර මෙම තීරණය ගත් බව හෙතෙම සඳහන් කළේය.

ඒ අනුව විශේෂ මිල ගණන් යටතේ එළවළු මිල දී ගැනීම ප්‍රාදේශීය ලේකම් කාර්යාල හරහා සිදු කරන බවද අමාත්‍යවරයා පැවසීය.

ඒ අනුව දඹුල්ල්ල  ගම්උදාව ක්‍රීඩාපිටිය, දඹුල්ල  පරණ සති පොළ භූමිය, විහාරය රථ ගාල, පැල්වෙහෙර රජයේ ගොවිපල, ගලේවෙල ක්‍රීඩාංගනය,  දේවහුව ගොවිජන සේවා මධ්‍යස්ථානය ,ලග්ගල ගොවිජන සේවා මධ්‍යස්ථානය, වීල්ගමුව ගොවිජන සේවා මධ්‍යස්ථානය නාවුල අලුගොල්ල ගොව්ජන සේවා මධ්‍යස්ථානය යන ස්ථානවලදී හෙට 11 දින උදේ සිට සවස් වනතුරුම ගොවීන් රැගෙන එන එළවළු තොග සියල්ලම රජය මිලදී ගැනීම සිදුකරන බවද අමාත්‍යවරයා පැවසීය.

රජය විසින් ලබා ගන්නා එළවළු ආවශ්‍ය  ප්‍රදේශවලට ප්‍රාදේශීය ලේකම් කාර්යාල හරහා බෙදා හැරීමේ කටයුත්තක් ක්‍රියාත්මක කර තිබෙන බවද හෙතෙම පැවසීය .

ආර්ථික මධ්‍යස්ථාන වසා දැමීමත් සමග ගොවීන්ගේ ව්‍යාපාරිකයන්ගේ රටේ ජනතාවගේ ආරක්ෂාව සඳහා  ගන්නා ක්‍රියාමාර්ග සියල්ල පසෙක දා ආර්ථික මධ්‍යස්ථානය වසා දැමීම සුදුසු බවට යෝජනා කළ ව්‍යාපාරිකයෝ ඉතා සූක්ෂම ලෙස නගරයේ සෑම ස්ථානයකම තබාගෙන ජනතාව රෝගී තත්ත්වයන් වලට පත් කරමින් ඉතා අඩු මිල ගණන් යටතේ එළවළු මිලදී ගැනීමේ ක්‍රියාවලියක් ද ආරම්භ කළ බවද අමාත්‍යවරයා සඳහන් කළේය.