(ශාන්ත චන්ද්‍රසිරි)

කොළඹට එළවළු ප්‍රවාහනය කරන ලොරි රථවලින් නුවරඑළිය දිස්ත්‍රික්කයට කොරෝනා වයිරසය පැමිණීමේ අවදානමක් ඉදිරි සති කිහිපයේදී ඇතිවිය හැකි බව  තලවකැලේ - ලිඳුල සෞඛ්‍ය වෛද්‍ය නිලධාරී ජනත් අබේගුණරත්න මහතා පැවැසීය.

අත්‍යවශ්‍ය සේවාවන් සඳහා ආරක්ෂක අංශවලින් ලබා ගන්නා ඇඳිරි නීති බලපත්‍රය උපයෝගි කරගෙන උඩරට එළවළු ලොරි රථ මගින් කොළඹ මැනිං වෙළෙඳ  පොල වෙත රැගෙන යන බවත් පසුව එම ලොරි රථවලට කොළඹ හරස්වීදිවලින් වෙනත් භාණ්ඩ පටවාගෙන රැගෙන එන බවත් මේ වනවිට මැනිං වෙළෙඳ පොල ආශ්‍රීතව කොරෝනා වයිරසය ආසාදනය වූ පුද්ගලයින් හමුවීම හේතුවෙන් මෙම අවදානම් තත්ත්වය නිර්මාණය වී ඇති බවත් ඒ මහතා පැවැසීය.

නුවරඑළිය දිස්ත්‍රික්කය රැකගැනීම වෙනුවෙන්  උඩරට එළවළු ප්‍රවාහනය කරනු ලබන ලොරි රථ සඳහා පොලිස් අවසර පත්‍රයට අමතරව සෞඛ්‍ය වෛද්‍ය නිලධාරීන්ගේ හා මහජන සෞඛ්‍ය පරීක්ෂකවරුන්ගේ ලිඛිත අවසරයක්ද සහිතව  සිදු කිරීමට පියවර ගන්නේ නම් මෙම අවදානම් අවස්ථා අවම කර ගැනීමට හැකියාව ඇති බවද අබේගුණරත්න මහතා වැඩිදුරටත් කීය.