(එච්. චන්දන)

කිළිනොච්චි  - මුලන්කාවිල් නාවික හමුදා කඳවුරේ  නිරෝධායන මධ්‍යස්ථානයේ  සිටි පුද්ගලයින් 04 දෙනකු හලාවත - ඉරණවිල පිහිටි  කොවිඩ් 19  ප්‍රතිකාර මධ්‍යස්ථානයට අද (15) ඇතුළත් කළ බව ඉරණවිල කොවිඩ් 19  ප්‍රතිකාර ඒකකය සඳහන් කරයි.

ජා ඇල ප්‍රදේශයෙන් හමුවූ කොරෝනා රෝගියා සමඟ ඇසුරු කළ  බවට සැකකෙරෙන  මුලන්කාවිල් නාවික හමුදා කදවුරේ  නිරෝධායන මධ්‍යස්ථානයේ  නිරෝධායනයේ යෙදී සිටියදී මෙලෙස හදිසියේම  පුද්ගලයින් 04 දෙනකු කොරෝනා රෝග ලක්ෂණ පෙන්නුම් කිරීම නිසා ඉරණවිලට රැගෙන ගොස් තිබේ.

ජා ඇල ප්‍රදේශයේ පිරිසක් මෙසේ රැගෙන ආ බව ඉරණවිල කොවිඩ් 19 ප්‍රතිකාර මධ්‍යස්ථානයේ වෛද්‍යවරු සඳහන් කළහ.

හලාවත - ඉරණවිල ඇමරිකන් හඩ භුමියේදී පිහිටි මෙම ප්‍රතිකාර මධ්‍යස්ථානය  තුල මේ වන විට රෝගීන 05 දෙනකු ප්‍රතිකාර ලබන අතර  මෙම නව රෝගීන 04 දෙනා සමඟ මේ වන විට කොවිඩ් 19  සෑදී මෙම ස්ථානයේ ප්‍රතිකාර ලබන සම්පුර්ණ රෝගීන් ගණන 09 ක් බව වෛද්‍යවරු පැවසූහ.