ඇමසන් වනාන්තරයේ ගෝත්‍රික ජනතාවට සේවය කරන වෛද්‍යවරයෙකුට කොරෝනා වයිරසය ආසාදනය වී ඇතැයි තහවුරු වූ බව බ්‍රසීලයේ සෞඛ්‍ය අමාත්‍යාංශය පවසයි.
 
ගෝත්‍රික ගම්මානයක් වෙත වයිරසය සෘජුවම ගමන් කළ බවට වාර්තා වන ප්‍රථම අවස්ථාව මෙය බව ඔවුහු වැඩිදුරටත් පවසති.
 
මෙම වෛද්‍යවරයා ඇමසන් වනාන්තරයේ ඉහළ ප්‍රදේශයේ කොලොම්බියා සහ පේරු දේශසීමා ආසන්නයේ ජීවත්වන ටිකුනාස් ගෝත්‍රික ජනතාවට සේවය කරයි. ඔහු නිවාඩු ගොස් සිට මාර්තු 18 දින නැවත සේවයට පැමිණ තිබේ.
 
එදිනම ඔහුට උණ වැළඳී ඇති අතර සතියකට පසු පරීක්ෂා කිරීමේදී වයිරසය ශරීරගතවී ඇතැයි තහවුරු වී ඇත.
 
වෛද්‍යවරාගෙන් ඖෂධ ලබාගැනීමට පැමිණි ගෝත්‍රිකයන් අට දෙනකු ද ස්වයං නිරෝධායනයට යොමුකිරීමට සිදුවූ බව බලධාරීහු පවසති.
 
ටිකුනාස් ගෝත්‍රිකයන් 30 000 ක් පමණ ඇමසන් වනාන්තරය ආශ්‍රිතව ජීවත් වන අතර බ්‍රසීලය පුරා 850 000ක පමණ ග්‍රෝත්‍රික ජනතාවක් වාසය කරති.
 
ගෝත්‍රික ජනතාවගේ ජීවන රටාව අනුව ඔවුන් සමූහ වශයෙන් ජීවත්වන බැවින් ඔවුන් අතර මෙවැනි වසංගත රෝග ව්‍යාප්ත වීමේ දැඩි අවදානමක් පවතින බව සෞඛ්‍ය විශේෂඥයෝ පවසති. 
 
මන්දපෝෂණය සහ වෙනත් රෝග හේතුවෙන් ප්‍රතිශක්තීකරණ පද්ධතිය දුර්වල වී ඇති ගෝත්‍රික ජනතාව අතර වයිරසය වේගයෙන් පැතිර යා හැකි බවට ද වෛද්‍යවරුන් බිය පළකර ඇත.
 
(රොයිටර් පුවත් ඇසුරිනි - 085)