(විනීතා එම් ගමගේ)

         

රටට ගැලපෙන ව්‍යවස්ථාවක් සකස් කිරීම ඉදිරි ආණ්ඩුවේ ප්‍රධාන කාර්යයක් සේ සළකා කටයුතු කරන බව ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතා ප්‍රකාශ කළේය.

මැතිවරණ ක්‍රමය වෙනස් කිරීම, විධායකයේ බලතල මෙන්ම ව්‍යවස්ථාදායකයේ බලතල පිළිබඳව පවතින ගැටළු ඉවත් කෙරෙන අන්දමේ ව්‍යවස්ථාවක අවශ්‍යතාව මතුවී පවතින්නේ යැයි ද හෙතෙම කියා සිටියේය.

19 වන ව්‍යවස්ථා සංශෝධනයේ බොහෝ ප්‍රශ්න පවතින්නේ යැයි කී ඔහු හොඳ උදාහරණය ලෙස පෙන්වා දිය හැක්කේ 30 දෙනෙකුගෙන් යුත් ඇමැති මණ්ඩලයක් පත්කළ යුතු යැයි කියවෙන අතරම එහි තවත් වගන්තියකින් එය උල්ලංඝනය වීම යැයි ද ඔහු පෙන්වා දුන්නේය.

මේ වනවිට පිහිටුවා ඇති කොමිෂන් සභා සැබෑ වශයෙන්ම ස්වාධීන කොමිෂන් සභා බවට පත් කරන්නේ යැයි ද රාජපක්ෂ මහතා කීය.

මේ සඳහා වෙනත් කණ්ඩායම්වල බලපෑම් වලින් තොරව පාර්ලිමේන්තුවේ කටයුතු කිරීම සඳහා ශක්තිමත් ආණ්ඩුවක් සකස් කළ යුතුව ඇතැයි ද ඒ සඳහා තුනෙන් දෙකක බලයක් සහිත ආණ්ඩුවක් ඇති කිරීමට ජනතා සහ අවශ්‍ය යැයි ද රාජපක්ෂ මහා කියා සිටියේය.

එමෙන්ම ශක්තිමත් විපක්ෂයක අවශ්‍යතාවය ගැන කථා කළ ශ්‍රී  ලංකා පොදුජන පෙරමුණේ ජාතික සංවිධායකවරයා, ජනතා විමුක්ති පෙරමුණටත් ඡන්ද ටිකක් වැඩිවන්නේ නම් යහපත් යැයි ද විහිලු සපයන විපක්ෂයක් ද බොළඳ විපක්ෂයක් ද යන්න ගැන ද ජනතාව අවදියෙන් සිටිය යුතු යැයි ද සඳහන් කළේය.

බැසිල් රාජපක්ෂ මහතා මේ අදහස් පළ කළේ කොළඹ කිංස්බරි හෝටලයේ අද (2) පැවැති මාධ්‍ය හමුවක් අමතමිනි. 

(ඡායාරූප - ජයමාල් චන්ද්‍රසිරි)