සොරුන් යැයි සිතා හරක් රංචුවකට බිය වූ කාන්තාවක් මධ්‍යම රාත‍්‍රියේ පොලිස් හදිසි ඇමතුම් අංශයට දැනුම් දීමේ පුවතක් අවිස්සාවේල්ල පොලිසියෙන් වාර්තා වේ. සිද්ධිය සැකෙවින් මෙසේය.

තම නිවස වටා කිසියම් පිරිසක් ඇවිදිමින් ජනේලවලට ද තට්ටු කරන බවත් මේ හේතුවෙන් තම වයෝවෘද්ධ මව හා දරුවා මෙන්ම තමා ද දැඩි භීතියකට පත්ව ඇතැයි පවසමින් කාන්තාවක් පොලිස් හදිසි ඇමතුම් ඒකකයට ඉතා ඉක්මණින් පොලිස් නිලධාරීන් එවන ලෙස බැගෑපත්ව පවසා ඇත්තේ නිවෙසේ ලිපිනය ද පොලිස් නිලධාරීන්ට පවසමිනි.

වහා ක‍්‍රියාත්මක වූ රාත‍්‍රි රාජකාරි බාරව සිටි පොලිස් නිලධාරීන් ජංගම මුර සංචාරක ජීප් රථයේ නිලධාරීන් අමතමින් නිවෙසකට සොරු පැමිධෑමට උත්සාහ කරන බවත් වහා එම ස්ථානයට යන ලෙසත් පවසා ඇත.

ලද පණිවිඩය අනුව ජංගම සංචාරයේ නිරත නිලධාරීන් එම නිවෙස සොයා පටු මාර්ගයක් ඔස්සේ ජීප් රථයෙන් ඉදිරියට යමින් සිටියදී දහ පහළොස් දෙනෙකුගෙන් සමන්විත මී හරක් රංචුවක් ඉදිරියට පැමිණෙමින් සිට ඇති අතර ඔවුන්ට යාමට ඉඩදී පණිවිඩය ලද නිවෙස සොයා ගොස් නිවස ඉදිරිපිට ජීප් රථය නවතනවාත් සමඟ නිවසේ ඉදිරිපිට දොර හැර කාන්තාවක් එළියට පිවිස නිවෙස වටා සිට ඇත්තේ මී හරක් රංචුවක් බවත් ඔවුන් නිවෙස වටා තිබෙන වල් පැලෑටි කෑමේදී අං නිවසේ වීදුරු ජනෙල්වලට වැදීමෙන් බිය වූ තමා සොරුන් පැමිණ ඇතැයි බියවී පොලිසියට දැන් වූ බවත් ප‍්‍රකාශ කර පැමිණි පොලිස් නිලධාරීන්ගෙන් මෙන්ම ඊයේ (11) පොලිස් ස්ථානයට ගොස් ස්ථානාධිපතිවරයාගෙන් ද සමාව ගෙන ඇතැයි පොලිස් ආරංචි මාර්ග පවසයි.

සොරුන් යැයි සිතා පොලිසියට දුරකතන ඇමතුම ලබාදී ඇත්තේ දුරබැහැර අධිකරණයක සේවය කරන නීතඥවරයෙකු බව ආරංචි මාර්ග සඳහන් කරයි.