(මීරිගම විශේෂ - පුෂ්පකුමාර මල්ලවආරච්චි)
රුපියල් ලක්ෂ දෙකකටත් වැඩි වටිනාකමකින් යුතු කැමරාව සහිත බෑගය කන්ද උඩරට හෝටලයක අමතකවීමෙන් තබා දුම්රියේ නැගී ගම්පහ ප්‍රදේශයේ නිවසට ආ කැමරා ශිල්පියෙකු ඒ බව සිහිපත්වීමෙන් පසු  එය ගෙන එන්නට ත්‍රිරෝද රියකින් කන්ද උඩරට බලා ගිය පුවතක් පසුගියදා වාර්තා විය.

ගම්පහ ප්‍රදේශයේ වීඩියෝ කැමරා ශිල්පියෙකි. ඔහුගේ කැමරාව අලුත්වැඩියාවක් කරන්නට සිදුවිය. ඒ ගැන ප්‍රවීණයකු සොයා උඩරට බලා ගියේ එය නියමිත පරිදි සකසා ගත යුතු නිසාය. හිමිදිරියේම දුම්රියෙන් ගමන පිටත්වී නියමිත ස්ථානයට ගිය ඔහු සිය කැමරාව අලුත්වැඩියාවට බාර දුන්නේය.

පස්වරු දෙක පමණ වන විට අලුත්වැඩියාව අවසන්විය. මුදල් ගෙවූ කැමරා ශිල්පියා ආපසු ගමනට සූදානම් වුවත් දැඩි කුසගින්නකින් පෙලෙමින් සිටියේය. හෝටල් දෙක තුනකට ගිය ඔහු ඒවායින් සෑහීමකට පත්වූයේ නැත. අන්තිමේ හොඳ හෝටලයකට ගොඩවී කැමරාව සහිත බෑගය මේසය යටින් තබා බඩ කට පුරා හොඳින් සප්පායම් විය. 

කා බී අහවර වෙද්දී දුම්රිය පිටත් වන වේලාව ආසන්න බව දැනුනි. ඉක්මන් ගමනින් එළියට ආ හෙතෙම ගමන් කළේ දුම්රිය ස්ථානයටය. ගමනට සැරසී සිටි ඔහු දුම්රියට නැගුණු වහාම පිටත්විය.

ගමනාන්තයට ළංවී බසින්නට සැරසී බලද්දී කැමරාව නැත. ඔහුට හීන් දාඩිය දැම්මේය. කැමරාව හෝටලයේ මේසය යට බව සිහිපත් වූයේ ඒ අවස්ථාවේදීය. හෝටලයේ කෑම කා ලද බිල්පත බලා දුරකතන ඇමතුමක් දී එය තවමත් තිබෙන බව තහවුරු කරගත් කැමරා ශිල්පියා දුම්රියෙන් බට වහාම දන්නා හඳුනන ත්‍රිරෝද රියකට ගොඩවී යළි උඩරට බලා ගමන් ගත්තේය. මැදියම් රැයට ආසන්න වෙද්දී යළි ගමට ආ හෙතෙම ත්‍රීරෝද රථයේ ගාස්තුව ගෙවා දැම්මේ තමන්ටම හිතින් දොස් පවරා ගනිමිනි.