විවාහකයකු වූ ඔහු පෞද්ගලික ව්‍යාපාරිකයෙකි. ඇය පෞද්ගලික ආයතනයක සේවිකාවකි. දෙදෙනා අතර සබඳතාවක් වුවත් එය ගෙවල්වලට මෙන්ම රටටද රහසක් විය. පසුගිය දා යතුරුපැදියෙන් ගිය ඔහු මහ වැස්සෙන් බේරීමට මහ මඟ වූ වෙළෙඳ සලකට ගොඩ විය. මහ වැස්සට හසුවූ ඇය ද එහි වූවාය. එහෙත් ඇගේ අතෙහි කුඩයක් විය. දිගු වේලාවක් කතාබහේ නිරතවූ ඔහු ”මේක පායන වැස්සක් නොවේ. ඔයාට ඔෆිස් වෙලාව වරදිනවා. කුඩේ ඉහළගෙන බයික් එකේ යමු” කීවේය. එයට මුලදී අකමැති වූ ඇය පසුව එකඟ වූයේ වැස්සේ අඩුවක් නොවූ නිසාය. කුඩය ඉහළාගෙන ඔවුන් යතුරු පැදියෙන් ගියේ මඳ දුරකි. ඇය ඔහුගේ මුහුණ ආවරණය වන සේ කුඩය ඇල්ලීම නිසා යතුරු පැදිය පාලනය කර ගත නොහැකිව කාණුවකට පෙරළිනි. ඔහු බේරුණත් ඇයට සුළු තුවාල සිදු විය. අමාරුවෙන් නැගිට ගත් ඔහු සිදුවූයේ කුමක්දැයි ඇසූවිට ඇය කීවේ ඉදිරියෙන් තම සහෝදරයකු ආ නිසා ඔහු හඳුනා ගනීවි යැයි සිතා කුඩයෙන් මුහුණ ආවරණය කළ බවකි. ඔහුට යකා වැහුණත් ඒ බව නොපෙන්වා යළි ඇය යතුරුපැදියට නංවා ගත්තේ රෝහලට යාමටලූ.