ගංජාවලට ඇබ්බැහි වූ තෙල්දෙණිය ප්‍රදේශයේ තරුණයන් කීපදෙනෙක් යතුරුපැදිවල නැගී ගොස් තෙල්දෙණිය රඹුක්වැල්ල ග්‍රාම පෙදෙසේ ‘වික්ටෝරියා ජලාශ රක්‍ෂිතයේ ගංජා උරමින් සිටියදී ප්‍රදේශවාසීන් විසින් එම ගංජා මත්ලෝලී තරුණයන්ට එළවා එළවා පහරදුන් පුවතක් තෙල්දෙණිය ප්‍රදේශයෙන් වාර්තා විය.

ගංජා සඳහා ඇබ්බැහි වූ තරුණයන් නිතර නිතර රඹුක්වැල්ල ප්‍රදේශයේ වික්ටෝරියා ජලාශ රක්‍ෂිත පෙදෙසට පැමිණෙන අතර ඔවුන්ගේ එම ක්‍රියාවන්ට ප්‍රදේශවාසීන් වරින් වර විරෝධය පළකර එම තරුණයන්ට ගංජා දුම්පානය සඳහා රඹුක්වැල්ල ප්‍රදේශයට නොපැමිණෙන ලෙස දැනුම්දී තිබේ.

එහෙත් ගම්වාසීන්ගේ බසට අවනත නොවූ උඩවෙල ප්‍රදේශයේ ගංජා මත්ද්‍රව්‍ය භාවිතයට ඇබ්බැහි වූ තරුණයන් කීපදෙනෙක් යතුරුපැදිවලින් පැමිණ ගංජා මත්ද්‍රව්‍ය භාවිත කරමින් සිටියදී කෝපයට පත්වූ රඹුක්වැල්ල ගම්වැසියන් පිරිසක් ඔවුනට පහරදී පන්නා දැමූ බව ප්‍රදේශවාසියකු පැවසීය. නැවතත් යළිත් මෙම ප්‍රදේශයට පැමිණ ගංජා මත්දුම් උරන්නේ නම් එම මත්ද්‍රව්‍යයට ඇබ්බැහි වූවන් සහ ඔවුන්ගේ යතුරුපැදි ද සමග ඔවුන් අල්ලා තෙල්දෙණිය පොලිසියට බාර දෙන බව රඹුක්වැල්ල ගම්වාසීහු පැවසූහ. පාසල් හැරගිය වයස අවුරුදු 20-25 පසුවන සහ අමතර පන්තිවලට යන තරුණ සිසුන් මෙන්ම පාසල් සිසුන්ද යතුරුපැදිවල පැමිණි වික්ටෝරියා ජලාශ රක්‍ෂිත පෙදෙස්වල ගංජා, හෙරොයින් වැනි මත්ද්‍රව්‍ය භාවිත කරන බව තෙල්දෙණිය සහ රඹුක්වැල්ල ප්‍රදේශවාසීහු පවසති.
(ජේ.ඒ.එල්. ජයසිංහ) ​