මුහුදේ නාමින් සිටිය දී රළ පහරට හසුවී අනතුරකට ලක්වීමට ගිය පිරිසක් එයින් බේරා ගැනීමට උපදෙස් දුන් ජීවිතාරක්ෂක සේවකයකුට එම පිරිස විසින් ස්තූති කරනවා වෙනුවට නෑමට බාධා කළේ යැයි උරණ වී පොලූ පහර දී තුවාල සිදුකිරීමේ සිද්ධියක් බෙන්තොට මුහුදු වෙරළේ දී සිදුවිය.

මේ දිනවල බෙන්තොට මුහුදු තීරයේ නෑම අනතුරුදායක නිසා ඒ බව හැඟවීමට රතු කොඩියක් ද වෙරළේ සවිකර තිබේ.

ඒ ගැන නොතකා බොහෝ දෙනා මුහුදේ නෑමට පෙළඹී සිටිති.

එවැනි පිරිසක් මුහුදේ නාමින් සිටිනු දුටු බෙන්තොට මුහුදු වෙරළේ ජීවිතාරක්ෂක ඒකකයේ සේවකයකු වූ ඩබ්ලිව්. කුමාර  සිල්වා මහතා වහා මුහුදට බැස නලාවක් ශබ්ද කර මුහුදේ රළ පහර වේගවත් බව හඟවා දියඹට නොගොස් ගොඩට එන ලෙස එම පිරිසට දැන්වීය. එහෙත් ඔවුන් එම දැන්වීම නොතැකූ නිසා තවත් කීපවරක් කුමාර මහතා මෙම අනතුරු හැඟවීම කළේය.

එවිට එම පිරිසෙන් කීප දෙනෙක් ගොඩට පැමිණ නෑමට බාධා කළේ යැයි බැණ වදිමින් කුමාර මහතා එළවාගෙන ගොස් ඒ අසල තිබූ මුහුදේ අනතුරු බව හඟවන රතු කොඩිය සවිකර තිබූ ලීය ගලවා එයින් කුමාර මහතාට පහරදී ඇත. මේ හේතුවෙන් පිට පෙදෙසට තැලූම් තුවාල ලද කුමාර මහතා බෙන්තොට පොලිසියට පැමිණිල්ලක් ද කර ප‍්‍රතිකාර ලබා ගැනීමට රෝහල්ගත විය.

පසුව වෙරළේ සිටි තවත් පිරිසක් මේ අරගලය සමථයට පත් කිරීමට යාමේදී කුමාර මහතාට පහරදුන් පිරිසේ අයකු ද තුවාල ලබා තිබිණි.

කෙසේ හෝ පසුව පොලිසිය මැදිහත් වී දෙපාර්ශ්වයේම එකඟතාව මත මෙම ආරවුල සමථයකට පත් කළේය.

වසර ගණනාවක් තිස්සේ මුහුදේ ගිලීමට ගිය සිය ගණනක් බේරාගැනීමට දායකවී සිටි තමාට ප‍්‍රථම වරට සිදුවූ මෙම අලකලංචිය අමතක නොවන සිද්ධියක් වූ බව කුමාර මහතා පැවසීය.