මිතුරෙකුගේ උපන් දිනය දා කිහිප දෙනෙක් මධුවිත තොලගාමින් සිටියහ. ක‍්‍රීඩාවට ඇල්මක් දැක්වූ මෙම තරුණයන් ඒ වේලාවේ නරඹමින් සිටියේ ඔලිම්පික් තරගයයි. තරග අතරතුරදී මිතුරන් පිරිසක් පැවසුවේ මෙවර ද රන් පදක්කම් වැඩි ප‍්‍රමාණයක් ලබා ගන්නේ ”චීනය” බවය. අනෙක් මිතුරන් පැවසුවේ චීනය නොව ඇමෙරිකාව බවය. අවසානයේදී මොවුහු අපූරු ඔට්ටුවක් ඇල්ලූහ. ඒ තමන් ජයග‍්‍රහණය කරනු ලබන බව පවසන රට පරාජය වුවහොත් ඒ අය මධ්‍යම රාත‍්‍රි දොළහේ සිට අලූයම තුන දක්වා මල්වතු ඔයට උපන් ඇඳුමෙන් බැස ස්නානය කළ යුතු බවය. බොහෝ කලකින් මල්වතු ඔයේ ස්නානය කර නොතිබූ නිසා සියල්ලෝම එයට එකඟ වූහ. බමන මතින් සිටියද දෙපිරිසේම අදහස වූයේ ඔට්ටුව සාදයට පැමිණි මිතුරන් හැර අන් අය දැන නොගත යුතුය යන්නය. දින කිහිපයකට පසු ඔලිම්පික් ක‍්‍රීඩා උත්සවය නිමා වූ අතර, ජයග‍්‍රහණය කළේ ඇමරිකාවය. ඔට්ටුවෙන් පරාජයට පත්වූ අය දිනූ අය සමග පසුගිය දිනෙක කාටත් හොරා රාත‍්‍රි 11.45ට පමණ මල්වතු ඔය වෙත පිය නගන්නට වූහ. පාරේ කිසිවකුත් නොවූහ. ඔට්ටුව පරාජය වූ තරුණයෝ ඇඳුම් සියල්ල උනා තබා මල්වතු ඔයට බටහ. මාස කිහිපයකින් අනුරාධපුරයට වර්ෂාව නොලැබුණු නිසා මල්වතු ඔයේ වතුර තිබුණේ ස්වල්පයකි. එම වතුරේ ද දුර්ගන්ධයක් පැවතුණි. තරුණයෙක් පැවසුවේ ”මේ වතුර නෑවා නම් කොළරාව තමයි” යනුවෙනි. ඔට්ටුව ජයග‍්‍රහණය කළ තරුණයෝ ද පැමිණ ජලය පිරික්සූහ. ඔවුන්ගේ අදහස වූයේ වරුසාව ලැබී මල්වතු ඔය පිරුණාට පසු ඔට්ටුව ඉටු කිරීම සාධාරණ බවය. නැවත ඇඳුම් ඇඳගත් ඔට්ටුව පරාජය වූ කණ්ඩායම මිතුරන් සමග නිවෙස් බලා පිටත් විය.