(කෑගල්ල අධිකරණ චමින්ද වැවතැන්න)
සිය මුනුපුරා විසින් ලියන ලද පෙම් හසුන් පතක් ඔහුගේ පෙම්වතියට දීමට රැගෙන යමින් සිටි සීයා අල්ලපු ඉඩමක කපා තිබු වැසිකිළි වළකට වැටී ඇතැයි කියන පුවතක් කෑගල්ල ප්‍රදේශයේ ග්‍රාමයකින් වාර්තාවෙයි. මෙලෙස වැසිකිළි වළකට වැටී ඇත්තේ කෑගල්ල මොළගොඩ ප්‍රදේශයේ ගමක පදිංචි 74 හැවිරිදි අයෙකි.


වාර්තා වෙන අන්දමට සිද්ධිය මෙසේය.


මොහුගේ එක් දරුවකු විදේශ රටක රැකියාවක් කරන අතර ලේලිය හා ඔවුන්ගේ පිරිමි දරුවන් දෙදෙනා සමඟ මෙම වයෝවෘද්ධ පියා තනි නොතනියට එම නිවසේ වසරක පමණ කාලයක සිට ජීවත් වෙයි. මුණුපුරන් දෙදෙනාගේ වයස 21 සහ 17ක් වන අතර, 21 හැවිරිදි මුණුපුරා වරකාපොළ තුල්හිරිය ප්‍රදේශයේ ඇඟළුම් ආයතනයක සේවය කරයි. ඔහු අල්ලපු ගමේ පදිංචිව සිටින 19 හැවිරිදි ශිෂ්‍යාවක් සමග මීට මාස කිහිපයකට ඉහතදී ප්‍රේම සම්බන්ධතාවක් ඇතිකරගෙන තිබිණි. මෙම තරුණයා පෙරේදා 26 දා සිය පෙම්වතියට පෙම් හසුන් පතක් ලියා සීයා අතේ යැවීමට කටයුතු කර තිබිණි.


පෙම් හසුන රැගෙන කිලෝමීටරයක් පමණ ඈතින් යන සිසුවියට දීමට කෙටි මාර්ග යකින් යද්දී සීයා අසල්වැසි නිවසක අඩි නවයක් පමණ කපා තිබූ වැසිකිළි වළකට වැටිණි. සීයාගේ ප්‍රමාදය බැලීමට ගිය මුණුපුරාට දැකගත හැකිවූයේ සීයා අල්ලපු නිවසක වැසිකිළි වළට වැටී ඇති අයුරුයි. පසුව මුනුපුරා නිවසට දිව ගොස් ඉනිමගක් ගෙන වළට දමා සීයා ගොඩට ගත්තාලු.